Sónar-hátíðin haldin aftur að ári

„Við erum ánægðir með að hátíðin fari fram aftur,“ segir Björn Steinbekk, skipuleggjandi tónlistarhátíðarinnar Sónar Reykjavík.

Staðfest hefur verið að hátíðin fari fram í annað sinn í Hörpu dagana 13. til 15. febrúar á næsta ári. Hátíðin verður með svipuðu sniði og nýliðin hátíð sem haldin var í febrúar nema að tveimur sviðum verður bætt við, ásamt því að Sónar mun standa yfir í þrjá daga í stað tveggja. Eldborgarsalur Hörpu verður einnig nýttur til tónleikahalds og verður tilhögun þeirra tónleika kynnt síðar.

„Markmiðið er að hátíðin verði stærri eins og sést á því að við bætum einum degi við dagskrána. Við gerum okkur vonir um að innan tveggja til þriggja ára verði þetta orðin fimm til sjö þúsund manna hátíð,“ segir Björn.

Rafræn tónlist var áberandi á fyrstu hátíðinni þar sem fram komu Squarepusher, Alva Noto & Ryuichi Sakamoto, Modeselektor, James Blake og fleiri flytjendur. Spurður hvort fleiri erlendir listamenn úr meginstraumnum verði á næstu hátíð segir Björn að það eigi eftir að koma í ljós. „Við munum skoða hvaða listamenn henta best fyrir íslenskan markað. Sónar er hátíð sem hreykir sér af því að vera með það sem þykir nýtt og ferskt í tónlistarbransanum.“

Forsala miða hefst 17. apríl klukkan 10.00 á Midi.is og verður takmarkað magn miða í boði á 13.900 krónur. - fb