Langar til Cannes með Gosling

"Við erum að kanna Cannes-möguleikann. Það er ekki búið að staðfesta og við erum allir í biðstöðu,“ segir Þórir Snær Sigurjónsson, einn af yfirframleiðendum kvikmyndarinnar Only God Forgives. Aðalleikari hennar er hjartaknúsarinn Ryan Gosling og leikstjóri er Daninn Nicolas Winding Refn, sem leikstýrði Gosling einmitt í Drive með eftirminnilegum árangri. Þórir Snær vonast til að frumsýna myndina á Cannes-hátíðinni í Frakklandi í maí en tilkynnt verður um hvaða myndir komast þangað inn 18. apríl. "Ég trúi ekki öðru en að það muni ganga en það eru líka einhverjir aðrir möguleikar í stöðunni eins og hátíðin í Feneyjum. “Hann er mjög ánægður með myndina, sem þykir vera ansi ofbeldisfull. "Hún er dálítið svakaleg. Ég held að annað hvort eigi fólk eftir að elska hana eða hata hana.“ Þórir Snær er einnig að skima um eftir leikurum fyrir myndina Z For Zachariah, sem hann framleiðir einnig. Nú þegar er búið að ráða stjörnuna Tobey Maguire í aðalhlutverkið. "Það skýrist í næsta mánuði. Maður þorir ekki að segja neitt fyrr en það er búið að skrifa undir.“ Fyrirtæki Þóris Snæs á Íslandi, Zik Zak, er bæði með Z For Zachariah og Kalt vor í leikstjórn Hafsteins Gunnars Sigurðssonar, á sinni könnu. Íslenska myndin fer í tökur á Flateyri í sumar og verður fjármögnun hennar lokið á næstu vikum.