No homo á leið til Cannes

Stuttmyndin No homo eftir Guðna Líndal Benediktsson verður sýnd á Short Film Corner á kvikmyndahátíðinni í Cannes í vor. Myndin fjallar um tvo vini og þær breytingar sem verða á vinskapnum þegar annar þeirra kemur út úr skápnum.

„Myndin er útskriftarverkefni mitt úr Kvikmyndaskólanum þar sem ég lærði handritaskrif og leikstjórn. Hún fjallar um tvo bestu vini og þegar annar þeirra kemur út úr skápnum bregst hinn undarlega við og ákveður að halda fyrir hann veislu,“ útskýrir Guðni. Hann skrifaði handritið að myndinni, leikstýrði henni og sá um alla eftirvinnslu. Spurður út í titil stuttmyndarinnar segir Guðni að hann sé fenginn úr setningu í myndinni. „Þetta er frasi sem vinir nota stundum þegar þeir sýna hvor öðrum væntumþykju.“

Guðni segir umsóknarferlið hafa verið langt og flókið og að það hafi komið honum skemmtilega á óvart þegar hann fékk boð um þátttöku. Short Film Corner er vettvangur fyrir kaupendur og framleiðendur til að kynnast nýju og hæfileikaríku kvikmyndagerðarfólki. Guðni viðurkennir að þetta sé einstakt tækifæri fyrir ungan kvikmyndagerðarmann líkt og hann til að kynna sig og verk sín. „Öll hótel á svæðinu eru skelfilega dýr á meðan á hátíðinni stendur en ég held að ég fái fría gistingu þannig ég ætti að geta skrapað saman fyrir flugi og uppihaldi,“ segir hann að lokum.