Segir Íslendinga borða geitaheila

Tökur á fjórðu seríu sjónvarpsþáttanna Game of Thrones hefjast hér á landi á næstu dögum. Game of Thrones nýtur gríðarlegra vinsælda víða um heim en síðustu tvær þáttaraðir voru einnig teknar upp að hluta til hér á landi.

Aðalleikari þáttanna, Kit Harington, ræddi Íslandsdvölina í viðtali við The Hollywood Reporter á fimmtudaginn. Þar var hann meðal annars spurður út í það hvernig best væri að halda á sér hita í vetrarkuldanum.

„Hópurinn þjappar sér saman á milli taka því það er þrjátíu stiga frost þarna. Við erum eins og mörgæsahópur, allir leikararnir og aukaleikararnir, samanþjappaðir."

Í viðtalinu gerði Kit einnig tilraun til þess að sýna hvernig Íslendingar tala ensku; heldur harkalega og með miklum áherslum.

Leikarinn kom inn á matarmenningu okkar Íslendinga og sagði hana stórfurðulega. „Þau borða geitaheila og alls konar þannig," sagði hann við spyrilinn, sem trúði varla eigin eyrum.