Þori alveg að segja að ég ætla að vinna riðilinn

Tíu leikir á einum mánuði, ferðalög fram og til baka út um alla Evrópu og lítill möguleiki á að komast áfram. Síðasta haust sat í íslensku landsliðsmönnunum en nú er allt annað upp á teningnum. Hafi íslenska körfuboltalandsliðið átt einhvern tímann raunhæfa möguleika á að komast á EM þá er það núna.

„Möguleikinn á að komast inn á EM hefur verið frekar lítill í gegnum tíðina ef hann hefur verið einhver. Við teljum okkur fá gott tækifæri núna á móti þessum liðum,“ segir Hlynur Bæringsson, fyrirliði íslenska liðsins.

Ísland er í riðli með Búlgaríu og Rúmeníu og efsta liðið kemst í fjögurra liða úrslitakeppni. Þar er spilað heima og heiman í undanúrslitum og úrslitum og sigurvegarinn verður meðal 24 þjóða á EM í Úkraínu árið 2015.

„Maður leyfir sér alltaf að vona. Við eigum tvo síðustu leikina á heimavelli og mitt takmark er því að vera í góðum „sjens“ með að geta klárað þetta hérna heima,“ segir Hlynur en bætir svo við:

Ætlar að vinna riðilinn

„Takmarkið hjá mér er að vinna þennan riðil og ég þori alveg að segja það. Það er bara þannig. Auðvitað eru þetta góð lið og við þurfum að eiga virkilega góða leiki en það verður bara að gerast,“ segir Hlynur.

Landsliðið hefur verið á miklu skriði og er búið að vinna fjóra leiki í röð, tvo á vináttumóti í Kína (Svartfjallaland og Makedónía) og svo tvo vináttulandsleiki við Dani.

Staðan á Jóni Arnóri

Jón Arnór Stefánsson gat ekki spilað á mótinu í Kína og var ekki kominn í sitt allra besta form á móti Dönum.

„Við erum búnir að fá Hörð Axel aftur inn síðan í fyrra og hann á eftir að vera með stórt hlutverk. Jón er okkar besti leikmaður og verður að eiga góða leiki ef við ætlum að fara áfram. Ég held að við lifum það alveg af þótt að hann sé ekki alveg hundrað prósent,“ segir Hlynur.

„Við ætlum að fara í alla leiki til að vinna þá. Búlgarar eru taldir sterkastir en það þýðir ekki að við löbbum yfir Rúmeníu. Búlgaríuleikurinn er algjör lykilleikur fyrir okkur og hann má ekki fara illa. Við verðum eiginlega að vinna hann en hann má alls ekki fara illa því þá setjum við okkur í holu,“ segir Hlynur. Hann fagnar tækifærinu til að fá að spila landsleiki en liðið spilaði ekki leik árið 2010.

„Það er gaman að fá verkefni það hefði ekki verið skemmtilegt ef það hefði ekkert verkefni verið. Það er aldeilis gulrót ef allt gengur upp en það er ansi langt í það enn þá,“ segir Hlynur. Liðið sem vinnur riðilinn mætir sigurvegara úr C-riðli en þar leika Danmörk, Sviss, Austurríki og Lúxemborg.

Tvíeggjað sverð

Hlynur er sjálfur í rosaformi og sýndi það meðal annars með frábærri frammistöðu á móti Dönum. „Mér hefur gengið mjög vel og ég þekki þetta kerfi ákaflega vel. Ég pikka upp stig hér og þar með því að kunna kerfið og það hjálpar mér mjög mikið. Það er tvíeggjað sverð að vera alltaf á móti þessum stóru slánum. Það er hægt að nota ýmislegt á móti þeim og ég er oft töluvert sneggri heldur en þeir. Ég reyni að nýta mér það í þessum landsleikjum. Fæstir af þeim eru mjög hrifnir af því að hreyfa lappirnar en vilja bara vera inni í teignum og passa körfuna,“ segir Hlynur.

Hann hefur mikla trú á leikkerfi sænska þjálfarans Peters Öqvist. „Við verðum að vera með gott kerfi til þess að geta tæklað okkar veikleika. Það hjálpar lítið að væla yfir því að við séum eitthvað minni. Þegar við erum með djöfulgang og læti þá getum við núllað það út að einhverju leyti. Við reynum að gera okkar veikleika að styrkleika,“ segir Hlynur.