Rússar spenntir fyrir íslenskum ilmvötnum

„Við erum nýkomin frá Moskvu þar sem við vorum að heimsækja samstarfsmenn okkar og tala við pressuna,“ segir Andrea Maack, myndlistarkona og ilmhönnður, en vörur Andreu hafa slegið rækilega í gegn þar í landi.

„Við héldum móttökur í þremur risastórum verslunum, meðal annars versluninni Tsum í Moskvu, en það er einn voldugasti verslunarrisinn þar í borg,“ segir Andrea, en Tsum er stærsta deildaskipta sérvöruverslun í Austur-Evrópu, með yfir þúsund þekkt tískumerki á sínum snærum, meðal annars merki á borð við Harry Winston, Rolex, Dior, Chanel og svo mætti lengi telja. Auk þess er að finna í versluninni, veitingastaði, vindlastofu og Veuve Clicquot-kampavínsbar, svo eitthvað sé nefnt.

„Það er rosalega gaman að sjá hvað við erum að fá góðar viðtökur í Rússlandi. Sannarlega óvænt ánægja,“ segir Andrea jafnframt.

Andrea var einnig með kynningar í verslununum Gum og Vesna.

„Þetta eru allt æðislegar verslanir og heiður fyrir mig að komast að þarna. Það er svo ótrúlega gaman að upplifa Moskvu – það er rosa kraftur í öllum og öllu. Rússar eru svo miklir fagurkerar. Borgin er rosalega falleg og svo fundum við fyrir svo miklum áhuga og velvilja í garð Íslands,“ bætir Andrea við.

Andrea er nú komin aftur til Ítalíu þar sem hún starfar um þessar mundir.

„Ég ætla bara að halda áfram á meðan það gengur svona vel,“ segir Andrea, hógvær, en ilmvötn hennar eru nú fáánleg í yfir tuttugu löndum, allt frá Evrópu, til Bandaríkjanna til Miðausturlanda.

Erlend pressa hefur sýnt Andreu mikinn áhuga og fjallað hefur verið um Andreu í þekktum glanstímaritum á borð við Marie Claire, Costume, Elle og Vogue svo einhver séu nefnd.

Ilmhönnuðurinn Andrea Maack:



Andrea Maack er fædd árið 1977. Hún útskrifaðist úr myndlist í Listaháskóla Íslands árið 2005.

Andrea stofnaði fyrirtækið ANDREA MAACK PARFUMS formlega árið 2010, en fyrirtækið er íslenskt ilmvatnhús sem á uppruna sinn að rekja til myndlistarsýninga hennar. 

Árið 2010 voru þrjú ilmvötn sett á markaðinn á Íslandi. Í framhaldinu hófst öflug markaðssetning erlendis og hefur fjórum ilmvötnum verið bætt við flóruna. Varan er nú seld í yfir hundrað verslunum í Evrópu og Bandaríkjunum og þótt víðar væri leitað. 

Samstarf Andreu við ilmvatnsgerðarmennina (perfumera) er óvenjulegt að því leytinu til að þau vinna saman í að blanda ilmvötn út frá hugarheimi og myndlistarverkum hennar, en hver ilmur frá Andreu kominn er byggður á einhverju verka hennar.