Helena stigahæst í útisigri

Helena Sverrisdóttir skoraði 21 stig og var stigahæst hjá ungverska liði sínu Aluinvent DVTK Miskolc í 94-63 útisigri á Rucon Spisska Nova Ves í Mið-Evrópu deild kvenna í körfubolta í kvöld.

Helena hitti úr 8 af 14 skotum sínum í leiknum þar af 4 af 8 fyrir utan þriggja stiga línuna. Helena var auk þess með 8 fráköst á þeim 28 mínútum sem hún spilaði.

Lettinn Liene Jansone og hin bandaríska Brittainey Raven voru næststigahæstar í liði  með 17 stig hvor og þá var Rebecca Tobin með 14 stig og 11 fráköst.

Helena kom þarna mjög sterk til baka eftir skelfilegt kvöld í Eurocup-keppninni í vikunni þar sem hún klikkaði á öllum þrettán skotum sínum í stórtapi.