Reed í forystu - Woods í toppbaráttunni eftir frábæran hring

Bandaríkjamaðurinn Patrick Reed hefur tveggja högga forystu þegar að 18 holur eru eftir af Cadillac meistaramótinu sem fram fer á Blue Monster vellinum í Flórída. Reed er samtals á fjórum höggum undir pari en hann lék á 69 höggum í dag eða þremur höggum undir pari.

Aðstæður til þess að skora vel voru mun betri í dag heldur en í gær þegar að mikill vindur gerði kylfingum erfitt fyrir. Í öðru sæti eru þeir Jason Dufner og Hunter Mahan á tveimur höggum undir pari en þar á eftir koma Jamie Donaldson og Tiger Woods á einu höggi undir pari samtals. Woods spilaði frábært golf í dag og kom inn á sex höggum undir pari og með góðum lokahring gæti hann varið titilinn á Cadillac meistaramótinu sem hann sigraði  í fyrra með töluverðum yfirburðum.

Rory McIlroy átti alls ekki góðan hring í dag og spilaði sig úr toppbaráttunni en hann er í 19. sæti á þremur höggum yfir pari, sjö höggum á eftir efsta manni. Nokkur stór nöfn eru þó nálægt efstu mönnum og gætu hæglega barist um titilinn á morgun. Þar ber helst að nefna Spánverjann vinsæla Miguel Angel Jimenez sem er á sléttu pari ásamt nöfnunum Zach Johnson og Dustin Johnson.

Eitt er víst að lokadagurinn á eftir að verða mjög spennandi en hann verður í beinni útsendingu á Golfstöðinni frá klukkan 18:00 á morgun, sunnudag.