„Fyrst þegar rússneski herinn kom talaði ég við þau oft á dag. Þau gátu ekki ímyndað sér að á 21. öldinni væru skriðdrekar, herbílar og vopnaðir menn á götum bæjarins. Fólk er mjög vonsvikið og á erfitt með að sjá hvað framtíðin ber í skauti sér. Fólk er nú þegar uppgefið og sér ekki fyrir endann á ástandinu.“
„Fjölskylda mín vill ekki að Krímskagi verði hluti af Rússlandi. Alla mína ævi hef ég verið hluti af Úkraínu og það væri undarlegt að verða allt í einu rússnesk. Að koma til Íslands úkraínsk og koma til baka rússnesk.“
Á sunnudaginn verður atkvæðagreiðsla á Krímskaga um hvort svæðið gangi inn í Rússland eða ekki. Usniie telur að flestir íbúar svæðisins muni taka þátt í kosningunum.
„Ég hugsa þó að þetta sé ólögleg kosning. Það er skrítið að halda kosningar á meðan rússneskir hermenn eru í Úkraínu og svo margir eru vopnaðir á götum úti. Íbúar Krímskaga eru mjög vonsviknir vegna þessa.“
Mikill fjöldi íbúa hliðhollur Rússlandi
Varðandi mögulega niðurstöðu kosninganna segir Usniie:
„Í síðustu viku hélt ég að flestir myndu kjósa Úkraínu, en núna, eftir að hafa skoðað spjallþræði stuðningsmanna Rússlands, er ég hissa á hve margir vilji að Krímskagi verði hluti af Rússlandi. Ég skil ekki hvernig fólk getur hugsað slíkt,“ segir Usniie. „Sumir eru mjög ánægðir með veru hermannanna á Krímskaga.“
„Ég gat ekki ímyndað mér að það sem gerðist í gærkvöldi gæti gerst. Í borginni Dónetsk í austur Úkraínu, héldu stuðningsmenn Úkraínu annars vegar og Rússlands hins vegar mótmælafundi. Stuðningsmenn Rússlands réðust á stuðningsmenn Úkraínu og þrír létust og tíu manns fóru á spítala.“
„Þetta áttu að vera friðsamleg mótmæli, en fólk er svo reitt og ég skil ekki af hverju,“ segir Usniie.
Sjónvarpsstöðvum lokað
Usniie segir ennfremur að fjölmiðlar á svæðinu gefi mjög misvísandi myndir af ástandinu á Krímskaga.
„Þetta er eins og leikur. Ef þú horfir á fréttir frá Rússlandi, hugsar þú að þar sé allt í sóma og Pútín sé svo góður forseti að við verðum að vera hluti af Rússlandi. Ef þú horfir á úkraínskar fréttir færðu líklega rétta mynd af ástandinu.“
„Rússneskir hermenn lokuðu flestum sjónvarpsstöðvunum á Krímskaga. Fólk fær næstum engar hefðbundnar fréttir. Tvær sjónvarpsstöðvar virka og internetið, en lokað var fyrir aðgang að því í hlutum Krímskaga í þrjá daga. Í bæ foreldra minna er útgöngubann og enginn má vera á götum úti eftir klukkan níu á kvöldin.“
Usniie telur að Rússar muni ekki láta staðar numið við Krímskaga og muni einnig reyna að innlima austuhluta Úkraínu.
„Mér finnst ekki rétt af Pútín að ráðast svona á okkur þegar Úkraína er svo veikburða eftir átök síðustu mánaða. Ef hann hefði bara spurt, eru sumir sem vilja að Krímskagi gangi inn í Rússland. Ekki núna, þó þegar svo mikil vandamál eru í landinu. Ég held einnig að hann vilji ekki bara taka Krímskaga heldur einnig austurhluta Úkraínu.“
Í austurhluta Úkraínu er stór hluti íbúa hlihollur Rússlandi. Usniie segir þó gífurlegan mun vera á milli íbúa austurhluta landsins og vesturhlutans.
„Vonandi leysist úr þessu fljótlega,“ segir Usniie að lokum.
