Fyrsti laxinn er mættur í Kjósina

Það skal tíðindum sæta að fá fréttir af fyrstu löxunum í byrjun maí en það er staðfest að í dag dag mættu þeir fyrstu í Laxá í Kjós.

Samkvæmt leigutakanum Hreggnasa voru feðgarnir Ólafur Helgi Ólafsson og Ólafur Þór Ólafsson frá Valdastöðum sem tilkynntu fyrstu laxaferðirnar þetta sumarið. Laxinn sást í Laxfossi og var þar óumdeilanlega á ferðinni 10-12 punda nýrenningur.  Hvað þetta þýðir fyrir veiðina í sumar er óvíst en ef laxinn verður snemma á ferðinni er yfirleitt talið að ástandið í sjónum hafi verið gott, fiskurinn í nægu góðu æti og sjávarhitinn yfir meðallagi.  Við þessi skilyrði stækkar fiskurinn hratt og er því snöggur að leita upp í ánna sína þegar hann er tilbúinn til þess.  Það styttist í að laxveiðitímabilið hefjist og miðað við þessa frétt má reikna með að veiðimenn verði duglegri að kíkja í árnar sínar og leita að laxi sem gæti verið mættur töluvert á undan áætlun.