Stórurriði sleit sig lausann við Elliðavatn í gærkvöldi

Nokkuð vel mætt var við bakka Elliðavatns í gærkvöldi en heldur róleg var takan þrátt fyrir að hæglætis veður væri við vatnið og aðstæður hinar bestu.

Veiðin hefur verið ágæt í vatninu í vor en besti tíminn er þó framundan þegar vatnið fer að hlýna aðeins meira og púpan fer að klekjast í meira magni.  Þeir veiðimenn sem við ræddum við við vatnið í gær voru ekki búnir að verða mikið varir þrátt fyrir að hafa verið að kasta flugu í 2-3 tíma og þeir voru sammála um að það væri ansi skrítið hvað það var lítil uppítaka í gærkvöldi.  Einn og einn fiskur var þó að gefa sig en þeir voru þó flestir smáir.  Einn veiðimaður lenti þó í smá ævintýri við Riðhól seint í gærkvöldi þegar stór urriði stökk á litla púpu.  Baráttan stóð yfir í um 20 mínútur og tók fiskurinn rokur af og til en kom ansi nálægt landi inn á milli og sýndi sig vel.  Þegar nokkuð var dregið af urriðanum gerði veiðimaðurinn tilraun til að háfa fiskinn en hann passaði ekki í háfinn sama hvernig var reynt.  Eftir tvær tilraunir til að ná fiskinum varlega í land tók hann eina roku í viðbót með línu að undirlínu og var síðan laus.  Fiskurinn var að sögn ekki undir 6-7 pundum en slíkir urriðar sjást alltaf af og til í vatninu en erfitt hefur verið að fá þá til að taka.