Íhugar alvarlega að kæra Gylfa fyrir hatursáróður

„Það fauk svolítið í mig þarna þegar ég sá ummælin hans,“ segir Kristín Sævarsdóttir, stjórnarmeðlimur Hinsegin Daga, sem íhugar nú að lögsækja tónlistarmanninn Gylfa Ægisson fyrir ærumeiðandi ummæli í garð samkynhneigðra.

Kristín greindi frá þessu fyrst í færslu á Facebook-síðu sinni nú á miðvikudag þar sem hún sagðist „alvarlega vera að hugsa um að kæra Gylfa fyrir að vega að mannorði sínu og félaga sinna í Hinsegin dögum í Reykjavík með því að bendla þau við barnaníð og saka þau um heilaþvott.“

Færslan fékk töluverða athygli; á annað hundrað manns líkuðu við færsluna og rúmlega tuttugu manns lýstu stuðningi sínum við hugmyndina, þar á meðal Margrét Gauja Magnúsdóttir fyrrverandi forseti bæjarstjórnar í Hafnarfirði og borgarfulltrúinn Björk Vilhelmsdóttir.

Kristín vísar í færslu sinni í ummæli Gylfa, sem sjá má hér að neðan, þar sem tónlistarmaðurinn segir meðal annars að „Barnaníðingar sem misnota börn kynferðislega eru djöflar í mannsmynd sama hvaða trú þeir stunda“ í sömu anddrá og hann sakar Hinsegin daga um að hafa í skjóli yfirvalda heilaþvegið börn í fjölda ára.

„Það eru margir búnir að skora á mig að kæra Gyfla því það eru lög í landinu sem taka fyrir allan slíkan hatursáróður gegn ýmsum hópum,“ segir Kristín og vísar þar til 233 greinar almennra hegningarlaga. Þar stendur: 

[233. gr. a. Hver sem með háði, rógi, smánun, ógnun eða á annan hátt ræðst opinberlega á [mann eða hóp manna]1) vegna þjóðernis þeirra, litarháttar, [kynþáttar, trúarbragða eða kynhneigðar]1) sæti sektum …2) eða fangelsi allt að 2 árum.]3)

Hún hefur þó ekki tekið endilega ákvörðun um hvort af ákærunni verður eða ekki. „En það sem situr eftir eru hvað þetta eru ljót skilaboð sem hann er að senda ungu fólki, þá bæði ungmennum sem eru að horfast í augu við að vera samkynhneigð og líka bara börnum sem eiga samkynhneigða ástvini,“ segir Kristín.

Hún ætli að hugsa málið í góðu tómi áður en næstu skref verða tekin í málinu. „Það er svo mikið hatur þarna og heift að kannski er ekkert sniðugt að vera að ýfa þetta upp með því að beina athygli að þessum ummælum.“

Gylfi íhugaði að leggja fram kæru í fyrra

Þetta er ekki í fyrsta sinn sem málaferli hafa borist í tal í tengslum við Gleðigönguna en Gylfi Ægisson íhugaði sjálfur að leggja fram kæru á hendur Hinsegin daga í fyrra eins og frægt er orðið. Frá því greindi hann á Facebook-síðu sinni í september á síðasta ári og sagði hann kæruna lagða fram vegna „klámfenginna orða sem áttu að hafa borist í eyru lítilla barna á Gay Pride 2013“.

Meðal sönnunargagna sem Gylfi lagði fram voru ljósmyndir frá hátíðinni og skrif einstaklings sem Gylfi segir að hafi „farið með börnin sín burt frá ósómanum“. Þá sýndi Gylfi einnig ljósmynd af karlmanni í leðurbuxum „opnum að framan og sást í brókina og falið typpið þar bak við“

Kristín blæs á allt tal um klámvæðingu á Hinsegin dögum. „Það er miklu meiri klámvæðing í öllum tónlistarmyndböndum sem þú finnur á netinu og í fjölmiðlum. Þetta er auðvitað bara gleðiganga og fjölskylduviðburður fyrir alla aldurshópa þannig að mér finnast þessi ummælin hans algjörlega skot fyrir neðan mitti.“

Facebook-færslu Kristínar má sjá hér að neðan.

Post by Kristín Sævarsdóttir.