Upptökur á Ragnheiði standa yfir

Unnið er að upptökum á óperunni Ragnheiði eftir Gunnar Þórðarson og Friðrik Erlingsson með þátttöku Sinfóníuhljómsveitar Íslands og Óperukórsins. Óperan var fyrst flutt á konsertformi þrívegis í Skálholtskirkju og síðar í Eldborgarsal Hörpu og fékk meðal annars fimm stjörnur hjá gagnrýnanda Fréttablaðsins.

Tónskáldið Gunnar Þórðarson fylgdist vel með upptökum úr tækniherberginu í Norðurljósum í morgun. Upptökur munu standa yfir næstu daga. Sveinn Kjartansson tæknistjóri og Páll Guðmundsson hljóðmaður voru á staðnum fyrir hönd Stúdíó Sýrlands.

Talið er að um þrettán þúsund manns hafi séð Ragnheiði á níu sýningum í Hörpu. Stjórnandi óperunnnar var Petri Sakari en í aðalhlutverkum voru Þóra Einarsdóttir, Viðar Gunnarsson, Elmar Gilbertsson, Elsa Waage, Guðrún Jóhanna Ólafsdóttir og Jóhann Smári Sævarsson.