Rukkuð um 700 krónur fyrir að taka út úr hraðbanka

Rögnu Ingólfsdóttur brá heldur betur í brún þegar hún leit inn á heimabanka sinn á dögunum. Hún hafði notað kreditkortið sitt til að taka út úr hraðbanka Íslandsbanka. Úttektin kostaði hana tæpar 700 krónur.

„Ég tók 20 þúsund krónur út úr hraðbanka Íslandsbanka við Eiðistorg. Það kostaði 125 krónur sem ég greiddi til Íslandsbanka en ég fékk síðan inn á heimabankann minn gjald upp á 563 krónur frá Landsbankanum, þannig að þetta voru tæpar 700 krónur sem ég greiddi fyrir að nota hraðbankann,“ segir Ragna en hún vakti athygli á málinu á Facebook-síðu sinni.

Ragna, sem er margfaldur Íslandsmeistari í badminton og tvöfaldur Ólympíufari, býr á Seltjarnarnesi og er útibú Íslandsbanka á Eiðistorgi næsti banki við hana. Ragna er hins vegar í viðskiptum við Landsbankann.

„Þetta er mjög svekkjandi. Fyrir stuttu síðan þurfti ég að taka tvisvar út úr hraðbanka, með nokkurra mínútna millibili, og fékk síðan tæplega 1400 króna rukkun inn á heimabankann,“ segir hún en tekur þó fram að hún sé afar sátt við viðskipti sín hjá Landsbankanum, þetta hafi einungis komið henni á óvart.

Á vef Landsbankans segir að viðskiptavinir bankans greiði ekkert fyrir úttekt í hraðbönkum Landsbankans, en að viðskiptavinir annarra banka greiði 150 króna úttektargjald, sé notað debetkort. Sé notað kreditkort, líkt og í tilfelli Rögnu, er skuldfært af kortinu 2,20 prósent af þeirri upphæð sem tekin er út, sem svarar til 440 króna miðað við 20 þúsund króna úttekt. Ofan á það koma síðan 120 krónur vegna úttektargjaldsins hjá Landsbankanum. Samanlagður kostnaður er því um 685 krónur.

„Mér finnst þetta alltof hár kostnaður. Ég er búin að gera þetta nokkuð oft og búið að kosta mig mikið síðasta árið en framvegis reyni ég að taka út af debet eða jafnvel færi viðskipti mín til Íslandsbanka þar sem hann er nær mér. Ég get ekki ímyndað mér að Íslandsbanki muni rukka svona mikið ef ég tek út í þeirra banka,“ segir Ragna að lokum.