Vettvangur sem á að auðvelda uppgötvun á Norrænni tónlist

Þetta er fyrsta samnorræna tónlistarsíðan og hún kemur til með að hjálpa fólki að uppgötva norræna tónlist á auðveldari hátt,“ segir Anna Hildur Hildibrandsdóttir framkvæmdastjóri NOMEX eða Norræna útflutningsverkefnisins.

Vefsíðan www.nordicplaylist.com, eða Norræni spilunarlistinn er nýr vettvangur sem ætlaður er til að auðvelda áhugasömum að uppgötva nýja norræna dægurtónlist. „Síðan gerir okkur líka kleift að kynna okkur betur hvað er að gerast í tónlistarsenunni á Norðulöndunum.“

Vefsíðan sem er ný og var opnuð í janúar, er enn í þróun. „Þetta gengur rosalega vel, það hafa yfir 30.000 manns heimsótt síðuna á fyrstu vikunum,“ segir Anna Hildur.

Á Norræna spilunarslistanum er hægt að skoða lista sem norrænir tónlistarmenn hafa búið til. „Nanna Bryndís Hilmarsdóttir úr Of Monsters and Men bjó til lista fyrir síðuna fyrir skömmu. Þá velja listamennirnir tvö listamenn eða hljómsveitir frá hverju Norðurlandi,“ útskýrir Anna Hildur.

Norræni spilunarlistinn er einnig aðgengilegur á öðrum tónlistarveitum, líkt og á Spotify, Deezer og Wimp. Verkefnið er hluti af formennsku Íslands í Norrænu ráðherranefndinni 2014.

Norðurlönd í fókus, sem er verkefni á vegum Norrænu ráðherranefndarinnar og útvarpsstöðin X-ið standa fyrir kynningarfundi á Norræna spilunarlistanum, sem fram fer í Norræna húsinu í dag klukkan 12.00.

Francine Gorman, verkefnastjóri Norræna spilunarlistans, kynnir verkefnið og spilað verður brot af tónlistinni á listanum.

Pallborðsumræður fara fram í kjölfarið þar sem rætt verður um vægi spilunarlista í kynningu og miðlun á tónlist og horft á hvaða gildi Norræni spilunarlistinn hefur fyrir aukið kynningarsamstarf, bæði innan Norðurlandanna og um heim allan.

Í pallborðsumræðum taka til máls Francine Gorman, ritstjóri Norræna spilunarlistans, Sigtryggur Baldursson, framkvæmdastjóri ÚTÓN – Útflutningsskrifstofu íslenskrar tónlistar, Björn Steinbekk, framkvæmdastjóri tónlistarhátíðarinnar Sónar Reykjavík og Katrína Mogensen, söngkona hljómsveitarinnar Mammút. Um fundarstjórn sér Frosti Logason, útvarpsmaður á X-inu.