Endalok Útúrdúrs

Bókabúðinni Útúrdúr verður lokað daginn sem Hverfisgata verður opnuð á ný fyrir umferð. Af því tilefni verður útsala í búðinni í dag.

„Það eru tvær ástæður fyrir því,“ segir Ingvar Högni Ragnarsson. „Annars vegar vofir hættan á að við missum húsnæðið. Að öllum líkindum rís hér enn eitt hótelið. Hin ástæðan er sú að framkvæmdir, sem hafa staðið yfir á Hverfisgötu síðan í júlí, hafa dregist á langinn og það var hreinlega erfitt fyrir gesti að komast inn í búðina.

Sem stendur erum við að pakka ofan í kassa, en við ætlum að haga því þannig að við getum opnað aftur ef fýsilegt húsnæði býðst, en eins og staðan er í dag er ekkert mikið í boði,“ segir Ingvar Högni.