Mexikósk lkl-tacobaka

Unnur Karen Guðmundsdóttir bloggar á síðunni Hér er matur um mat…

Hún deilir uppskrift að mexíkóskri böku í lágkolvetna útgáfu.

Mexikósk lkl-tacobaka:

3,5 dl möndlumjöl

50 g smjör

1 tsk. paprikuduft

1/4 tsk. salt

1 egg

Hakkfylling:

500 g nautahakk

1 laukur

3 hvítlauksrif

2 dl. vatn

1 lítil dós, eða 2-3 msk. tómatpurée

2-3 msk. chili-sósa (t.d. frá Heinz – en þessu má sleppa og nota frekar hálfa dós af niðursoðnum tómötum eða annað sem er ekki jafn kolvetnaríkt og chili-sósan)

2 tsk. chili-duft (sleppið eða minnkið ef þetta á ekki að vera mjög sterkt)

2 tsk. cumin

2 tsk. kóríanderduft

1 msk. sojasósa

1-2 tsk. salt

Ostafylling

2-3 tómatar, eða eitt box af kirsuberjatómötum

1 dós, eða um 2 dl sýrður rjómi

3-4 msk. rjómaostur

150 gr. rifinn ostur



Byrjið á að gera deigið, því það þarf smá tíma til að standa og svo til að bakast áður en fyllingin er sett í það. Skerið smjörið í litla teninga og hnoðið það saman við möndlumjöl, salt og paprikuduft. Þegar þetta er orðið að mulningi er egginu bætt út í og hnoðað saman. Ef deigið er of blautt er minnsta mál að bæta við meira möndlumjöli eða kókoshveiti jafnvel. Þrýstið deiginu í bökuform eða annað eldfast mót. Stingið með gaffli hér og þar í botninn og látið deigið standa í smá stund. Bakið svo við 225°C í um 10 mín.

Skerið laukinn smátt og pressið hvítlaukinn, steikið svo ásamt hakkinu þar til hakkið er gegnumsteikt. Bætið vatni, tómatpurée, chili-sósu, sojasósu og kryddum út í og látið sjóða í 10-15 mín, eða þar til vatnið hefur að mestu gufað upp.

Hrærið sýrðum rjóma, rjómaosti og rifnum osti saman. Skerið tómatana í bita (í helminga ef kirsuberjatómatar) og dreifið yfir hakkið. Dreifið ostablandinu yfir tómatana.

Bakið við 200°C í 20 mín., eða þar til ostablandan hefur fengið fallegan lit.