Hundrað hnoð á mínútu

„Við viljum ýta við hópum sem annars mundu kannski ekki leiða hugann að skyndihjálp,“ segir Sólveig Ólafsdóttir, upplýsingafulltrúi Rauða krossins á Íslandi, um nýtt lag sem komið er út.

„Þess var gætt sérstaklega að takturinn í laginu hentaði við endurlífgun sem kallar á um það bil 100 hnoð á mínútu. Vonandi festist það í huga fólks,“ heldur hún áfram.



Í myndbandi sem fylgir með laginu lendir hinn seinheppni Klaufi í hremmingum en á skjótum viðbrögðum samferðamanna sinna líf sitt að launa.

Útgáfan er liður í skyndihjálparátaki sem Rauði krossinn er með í tilefni 90 ára afmælis síns á þessu ári.

Lagahöfundur er Snæbjörn Ragnarsson en textinn er eftir Sævar Sigurgeirsson. Tíu þekktir söngvarar og leikarar flytja lagið í sjálfboðavinnu, þau Gunnar Helgason, Saga Garðarsdóttir, Sigríður Eyrún Friðriksdóttir, Jóhannes Haukur Jóhannesson, Felix Bergsson, Agnes Björt Andradóttir, Ólafía Hrönn Jónsdóttir, Rúnar Freyr Gíslason, Ragnhildur Gísladóttir og Vilhelm Anton Jónsson.

Þórunn Lárusdóttir og Gunnhildur Sveinsdóttir höfðu umsjón með gerð myndbandsins, Erla María Árnadóttir myndskreytir gerði teikningarnar og Lára Garðarsdóttir gæðir teikningarnar lífi.

Sólveig segir skyndihjálpina eitt elsta og samfelldasta verkefni félagsins í 90 ára sögu þess. Því hafi þótt við hæfi að fara í skyndihjálparherferð í tilefni afmælisins.

„Okkur er mikið í mun að gera eitthvað sem kemur öllum til góða og við getum skilið eftir hjá þjóðinni,“ segir hún og heldur áfram.



„Við byrjuðum með skyndihjálpar-app sem hefur náð mikilli útbreiðslu. 25.000 manns hafa þegar sótt sér það enda ætti það að vera staðalbúnaður í öllum snjallsímum og spjaldtölvum.

Appið er gagnvirkt með fræðslu og skemmtilegum myndböndum og þar eru hagnýtar leiðbeiningar um það hvernig á að haga sér mitt í aðstæðum þar sem maður þarf skjót og skýr svör.

Skilin milli lífs og dauða geta verið svo stutt og fólk sem kann til verka á slysstað er svo mikilvægt.“