Latínvíkingurinn snýr aftur heim í Búðardal

Þetta er átta manna latínband sem er að fara að spila mína músík í Dalabúð ásamt söngvurum og danskennara,“ segir Tómas R. Einarsson um tónleika sem hann heldur heima í Búðardal annað kvöld.

„Þetta eru félagar mínir úr latínböndum í gegnum árin, svo verður tónleikagestum kenndur salsadans í hléinu þar sem tónlistin eftir hlé verður dansvænni en fyrri hlutinn og eins gott að fólk viti hvernig það á að bera sig að.“



Ástæðan fyrir þessu tónleikahaldi er dálítið óvenjuleg. „Ég er alinn upp inni í Hvammssveit í Dalasýslu og þetta er í fyrsta sinn sem ég kem á mínar heimaslóðir með stórt latínband,“ segir Tómas. „Tónleikarnir verða síðan ramminn í heimildarmynd sem verið er að gera um mig. Hún nefnist Latínvíkingurinn og aðalpersónan mætir á heimaslóðir með músíkina sem hefur orðið til vítt og breitt um veröldina.“



Það eru ekki bara gamlir félagar Tómasar í bandinu því þeir sem að heimildarmyndinni standa tengjast honum líka í gegnum tónlistina. „Framleiðandinn heitir Sigurður G. Valgeirsson og spilaði með mér í hljómsveit fyrir 32 árum,“ útskýrir Tómas. „Handritshöfundurinn spilaði líka í þeirri hljómsveit og sá heitir Sveinbjörn I. Baldvinsson.“



Stórhljómsveit Tómasar R. er, auk hans sjálfs og söngvaranna Sigríðar Thorlacius og Bógómíl Font, skipuð þeim Kjartani Hákonarsyni, Óskari Guðjónssyni, Samúel Jóni Samúelssyni, Ómari Guðjónssyni, Davíð Þór Jónssyni, Matthíasi MD Hemstock og Sigtryggi Baldurssyni. Um danskennsluna sér Jóhannes Agnar Kristinsson.



Staðurinn er félagsheimilið Dalabúð í Búðardal annað kvöld klukkan 20.30 og aðgangur er ókeypis.