Jón Arnór er brenndur síðan haustið 2006

Jón Arnór Stefánsson verður ekki með íslenska landsliðinu í undankeppni EM sem hefst með heimaleik við Bretland á sunnudaginn. Jón Arnór er samningslaus og tekur ekki áhættuna á að meiðast í þessum landsleikjum og missa af möguleikanum á því að finna sér nýjan samning. Jón Arnór er brenndur því hann meiddist illa á ökkla í landsleik haustið 2006.

„Ég lenti í slæmum meiðslum með landsliðinu sem klúðraði þessu Valencia-ævintýri fyrir mér,“ sagði Jón en hann tekur þessa ákvörðun í samráði við stjórn KKÍ. „Það hafði samt ekki áhrif á mig fjárhagslega því ég var það ungur. Það er bara annað dæmi í dag þegar ég er 31 árs og að verða 32 ára. Ungu pungarnir eru að berjast við mann um stöður og því þarf ég að vera klókur,“ segir Jón Arnór Óttast hann hvað fólk úti í bæ segi við þessu?

„Ég gerði það en það er ekki hægt að álasa mér fyrir að hugsa um mitt lifibrauð og mína fjölskyldu. Ég held að allir myndu taka þessa ákvörðun þó að þeir láti mig heyra það núna,“ sagði Jón Arnór og hann gæti enn dottið inn í liðið ef hann fær nýjan samning.

„Ég er búinn að æfa með landsliðinu og ætlaði allan tímann að vera búinn að klára þetta og vera með. Það gæti enn þá gerst ef ég sem í kvöld eða á morgun. Það er samt ólíklegt,“ sagði Jón Arnór og hann fær stuðning frá liðsfélögum sínum og þjálfara.

„Auðvitað er slæmt að missa Jón og Jakob er ekki heldur búinn að vera með okkur í sumar. Þetta eru tveir bestu skorarar okkar. En um leið og þetta kom í ljós þá þurfti maður bara að gleyma því að Jón væri til,“ sagði Pavel Ermolinskij í léttum tón. Jón Arnór nefnir Pavel sem og Loga Gunnarsson sem tvo leikmenn sem þurfa að skila meiru.

„Þetta er mikill missir enda okkar aðalmaður. Þetta er mjög erfið aðstaða sem hann er í en við skiljum hann allir og vitum bara að það er ákveðin ábyrgð sem færist á aðra núna,“ sagði Logi.

„Þetta er óheppilegt en alveg skiljanlegt. Ég hefði gert það sama og hann í sömu stöðu. Það styðja hann allir í hópnum, það væri auðvitað mjög gott að hafa hann en við erum ekki eina liðið sem er í svona stöðu,“ sagði Craig Pedersen, þjálfari íslenska liðsins.

Jón Arnór tekur það líka fram að hann hefur ekki spilað sinn síðasta leik.

„Ég er ekki hættur í landsliðinu, það er pottþétt. Ég ætla ekki að gefa eftir mína stöðu og kem bara og berst fyrir henni aftur næsta sumar,“ segir Jón Arnór léttur. Hvað með ef strákarnir koma liðinu inn á EM án hans?

„Hvernig væri það? Ef þeir gera það án mín þá get ég kannski bara hætt þessu. Það væri frábært og ég hef fulla trú á því að strákarnir geti unnið Bretland,“ sagði Jón Arnór. Hann lofaði því líka að kíkja inn í klefa fyrir leik. „Það verður samt fáránlegt að vera bara uppi í stúku að horfa á,“ sagði Jón að lokum.