Djúpt í huga mínum hringir bjallan inn

„Bjarnastaðir er eitt þeirra skólahúsa sem voru reist í kjölfar fyrstu fræðslulaganna er kváðu á um fjögurra ára skólaskyldu fyrir öll börn á Íslandi. Það var teiknað af Rögnvaldi Ólafssyni og Einari Erlendssyni og byggt á fimm mánuðum. Síðan eru liðin hundrað ár,“ segir Pétur Ármannsson arkiktekt um skólahúsið á Bjarnastöðum á Álftanesi.

Hann ætlar að segja sögu hússins á hátíðadagskrá í Íþróttahúsi Álftaness í dag sem stendur milli klukkan 14 og 16.

Auk hans verða Vigdís Finnbogadóttir, Guðmundur Andri Thorsson og Anna Ólafsdóttir Björnsson með erindi í fyrri hluta dagskrárinnar sem nefnist Bessastaðir og Bjarnastaðaskólinn.

En í seinni hlutanum rifja fyrrverandi nemendur upp minningar frá Bjarnastöðum. Að lokinni dagskrá verður opið hús að Bjarnastöðum þar sem sýndar verða myndir og munir sem tengjast skólanum.

Reyndar gæti Pétur tekið þátt í minningaþættinum líka því sem barn gekk hann í Bjarnastaðaskóla á árunum 1967 til 1973 og gæti eflaust tekið undir með Magga Eiríks sem orti: Djúpt í huga mínum hringir bjallan inn.

„Þetta var ekta sveitaskóli þegar ég var í honum enda var ekkert þéttbýli á Álftanesi þá. Það var kennt í tveimur deildum og voru svona 15-20 krakkar í hvorri deild,“ rifjar hann upp.

Skólahald var á Bjarnastöðum til 1978, eftir það var skrifstofa hreppsins þar uns sveitarfélagið sameinaðist Garðabæ 1. janúar 2013. Á síðustu mánuðum hefur verið unnið að gagngerum endurbótum á húsinu utanverðu.

„Þetta er eitt fárra skólahúsa frá fyrri hluta síðustu aldar sem hefur haldið ytra útliti og formi nokkurn veginn í upprunalegri mynd,“ segir Pétur.