Furðusagnasmiðjur Emils Hjörvars að hefjast

Bókmenntaborgin býður upp á furðusagnasmiðjur með rithöfundinum og bókmenntafræðingnum Emil Hjörvari Petersen á Lestrarhátíð í Bókmenntaborg 2014, en hún er nú haldin í þriðja sinn undir heitinu Tími fyrir sögu. Emil hefur þegar haldið þrjá opna fyrirlestra um furðusögur en nú er komið að því að áhugasamir geti spreytt sig á því að skrifa sínar eigin sögur.



Smiðjurnar fara fram í Borgarbókasafni Reykjavíkur í Tryggvagötu 15. Hópurinn hittist fjórum sinnum og er fyrsti tíminn á morgun klukkan 17. Athugið að það þarf að bóka þátttöku í ritsmiðjurnar og að sami hópurinn tekur þátt í öllum smiðjunum fjórum.



Meðal þess sem unnið verður með eru frumdrög, hugmynda- og rannsóknarvinna, hvernig fléttur eru myndaðar, bygging mótuð og atburðarás þróuð. Rætt verður um notkun íslenskunnar í furðusögum og persónusköpun, bygging samtala, sjónarhorn og stílbrögð verða áberandi.



Ritsmiðjurnar eru öllum opnar sem hafa náð átján ára aldri. Þær henta bæði þeim sem hafa reynslu af ritstörfum og þeim sem eru að stíga sín fyrstu skref, því smiðjurnar byggjast á nokkru sem er nýtilkomið hér á landi; á furðusögum sem skrifaðar eru á íslensku. Þátttaka er ókeypis.



Emil Hjörvar er höfundur þríleiksins Saga eftirlifenda, en síðasta sagan í seríunni er væntanleg nú í október.