Hélt föður mínum með lifandi svip en ekki uppstilltum

Kristján Eldjárn, forseti Íslands, kom oftar en þrjátíu sinnum í vinnustofuna til Sigurjóns Ólafssonar myndhöggvara til að sitja fyrir sumarið 1978.

Á morgun, sunnudag, klukkan 14, ætlar Þórarinn sonur hans að lesa upp frásagnir sem tengjast þessum heimsóknum. Upplesturinn fer fram í Listasafni Sigurjóns á Laugarnestanga. 

„Þegar Sigurjón var að gera mynd af pabba, þá var það þannig að þegar pabbi sat fyrir þá sagði Sigurjón sögur alveg stanslaust,“ lýsir Þórarinn. 

„Pabbi fór að hafa gaman af þessu og alltaf þegar hann kom heim þá settist hann við rafmagnsritvélina og skrifaði upp frásagirnar, eins og Sigurjón sagði frá í fyrstu persónu. Úr þessu varð dálítil syrpa og ég ætla að velja úr henni nokkrar sögur til að lesa upp. Sigurjón sagði sögur af því sem hann hafði upplifað í æsku á Eyrarbakka, við nám í Kaupmannahöfn og af mönnum og málefnum. Með þessu hélt hann föður mínum með lifandi svip en ekki uppstilltum.“ 

Á undan lestri Þórarins ætlar Hlíf, dóttir Sigurjóns, að lesa valda kafla úr viðtali sem Erlingur Jónsson átti við föður hennar. Þar lýsir hann aðferðum Sigurjóns við að ná fram svipbrigðum fyrirsætna sinna.