Margra barna mæður: Ótrúleg tilfinning að vera í Kína og fá barnið þitt í hendurnar

„Að ganga með barn er náttúrulega bara æðislegt. Þú ert með kúluna og finnur fyrir barninu þínu og þú tengist bumbubúanum. En þú tengist líka þessu barni úti og þú gengur með það. Þú gengur bara með það í huganum og hjartanu og það er alveg sama tilfinning að fá það í fangið. Hún er alveg jafndásamleg.“

Þetta segir Linda Jónsdóttir, fimm barna móðir og viðmælandi í þriðja þætti af Margra barna mæðrum á Stöð 2. Hún eignaðist dætur sínar þrjár ung að árum en þegar hún var að nálgast fertugt kynntist hún Valtý Bergmann Ármannssyni sem var þá barnlaus og starfaði sem smiður á Barbados.

Þau hafa verið saman frá því daginn sem þau hittust og fyrir sex árum ættleiddu þau dreng frá Kína sem fékk nafnið Valtýr Bergmann. Tveimur árum síðar ættleiddu þau annan dreng, Kristján Karl. Tvær dætra hennar voru þá komnar í háskóla og sú yngsta í framhaldsskóla.

Linda lýsir því sem ótrúlegri tilfinningu að vera stödd í Kína og fá barn í hendurnar sem er þitt. Hún segir það ekkert öðruvísi tilfinningu en þegar ljósmóðir réttir móður barn sem hún hefur fætt.

„Ég átti þau öll alveg jafnmikið og ég var alveg jafnástfangin af þeim öllum.“

Linda segir þó að henni hafi fundist það sárt að missa af tímanum hjá strákunum þegar þeir voru úti.

„Þeir höfðu upplifað ýmislegt án mín. Mér finnst það kannski stærsti munurinn. Ég fæ stelpurnar mínar sem óskrifað blað en strákarnir mínir eru búnir að lenda í einhverju sem ég veit ekki alveg hvað er og kem aldrei til með að vita nákvæmlega hvað er. Það finnst mér kannski einna verst af þessu, það er að hafa ekki verið með þeim frá byrjun.“

Innslag úr þættinum má sjá í spilaranum hér að ofan.