Kínverjar brjálaðir í jeppa

Þó svo að Bandaríkjamenn séu þekktir fyrir ást sína á jeppum og pallbílum virðist sem Kínverjar ætli jafnvel að slá þeim við. Sala á slíkum bílum í janúar og febrúar jókst um 66% frá árinu í fyrra. Heildarsala bíla í Kína á þessum tveimur mánuðum jókst um 16%.

Það er fleira sem Kínverjar eiga sameiginlegt með Bandaríkjamönnum er kemur að vali á bílum. Þekkt er ást þeirra vestra á fólksbílum sem bjóðast af lengri gerð en hefðbundin smíði þeirra. Kínverjar hafa eiginlega tekið þessa ást í enn meiri hæðir því varla seljast stærri fólksbílar eins og Audi A8, Mercedes Benz S-Class og BMW 7-línan nema af lengdri gerð í Kína.

Í Kína er langstærsti bílamarkaður heims og þar seldust alls 23,5 milljón fólksbílar og atvinnubílar í fyrra og var það ríflega fjórðungur af heimssölunni, sem var um 80 milljón bílar. Ef 16% söluaukning verður allt árið í ár líkt og hefur verið á fyrstu 2 mánuðum þessa árs verður sala bíla í Kína 27,3 milljón bílar. Ekki er þó búist svo mikilli sölu í ár, en í upphafi árs var spáð um 7% söluaukningu.