Hundurinn Lubbi hjálpar börnum að læra

„Einkennisefni Lubba eru táknrænar hreyfingar fyrir hvert málhljóð,“ segir Eyrún Ísfold Gísladóttir, talmeinafræðingur og annar höfunda bókarinnar Lubbi finnur málbein. „Forlagið fagnar því að fjórða útgáfa bókarinnar er að koma út en nú er einnig  komið nýtt efni sem heitir Hljóðasmiðja Lubba. Það eru fjórar smiðjur sem tengjast allar og fjalla um íslensku málhljóðin á lifandi hátt. Efnið er tekið lengra en í bókinni með orðabanka og verkefnum sem fylgja hverri örsögu um Lubba. Einnig er kominn út mynddiskur þar sem Lubbavísur eru sungnar sem sýnir börn gera hreyfingar á hljóðum með.

„Efnið hentar mjög breiðum hóp barna. Til dæmis er það bæði fyrir bráðger börn og þau sem eiga í erfileikum með lestur og ritun. Það hentar einnig þeim sem eru tví- og jafnvel þrítyngd,“ segir Eyrún. Efnið byggir á víðtækum rannsóknum Þóru Másdóttur, meðhöfundar Eyrúnar. „Hún gerði nýlega rannsókn á tileinkun málhljóða hjá íslenskum börnum,“ segir Eyrún en efnið byggir einnig á reynslu Eyrúnar á notkun tjáskiptamátans táknað með tali.

Bókin um Lubba hefur fengið gríðarlega góð viðbrögð og hafa þær haldið fjölda kynninga í leikskólum og grunnskólum landsins. Kynning á bókinni og hljóðasmiðjunni mun fara fram hjá Forlaginu á fimmtudaginn.