Eystri Rangá er að hrökkva í gang

Ein af vinsælustu veiðiám landsins síðustu ár er Eystri Rangá og hefur hún reglulega vermt toppsætið yfir aflahæstu árnar.

Veiðin var erfið framan af sumri vegna mikillar snjóbráðar sem litaði ánna og þar með dró úr veiði. Þá daga sem hún var hrein var veiðin þó oft með ágætum og eins og undanfarin ár er hlutfall stórlaxa í ánni alveg ótrúlega hátt en fram til þessa má telja eins árs laxa á fingrum beggja handa.

Fréttir frá bökkum Eystri Rangár eru góðar því það er greinilegt að göngurnar eru að aukast og á meðan stórlaxahlutfallið er jafn gott og það er eru veiðimenn kátir við bakkann. Ásta Dís Óladóttir og eiginmaður hennar, Jakob Bjarnason, áttu góðann dag við ánna í dag þegar þau náðu 6 fallegum löxum á land og þar á meðal einum 91 sm sem tók Sunray. Eins og sést á myndasyrpunni frá Ásdísi hefur greinilega verið mikil taka á laxinum og þetta veit ekki á neitt nema gott á framhaldið í ánni.

Við viljum endilega fá að heyra frá ykkur í sumar og hvetjum ykkur til að senda okkur veiðisögur og veiðimyndir úr ykkar veiðitúrum í sumar. Þið getið sent okkur póst á kalli@365.is