Ronda má hringja þegar hún hefur halað inn 40 milljarða á 36 mínútum

Besta bardagakona heims, Ronda Rousey, lét boxarann Floyd Mayweather heyra það á Espy-verðlaununum um daginn. Þá hafði hún betur gegn Mayweather í vali á mesta yfirburðaríþróttamanni heims í dag.

Hún spurði hvernig það væri fyrir Mayweather að tapa fyrir konu til tilbreytingar. Hún notaði orðið „beaten" og var augljóslega að vísa í heimilisofbeldissögu Mayweather.

Rousey sagðist hafa beðið í heilt ár með að láta Mayweather heyra það en í fyrra sýndi hann henni þá vanvirðingu að þykjast ekki þekkja hana. Ronda sagði að það væri algjört kjaftæði. Mayweather vissi vel þá hver hún væri.

Mayweather er loksins búinn að svara fyrir sig.

„Ronda má hringja í mig þegar hún er búin að hala inn 40 milljörðum á 36 mínútum," sagði Mayweather en allt snýst um peninga hjá honum.

Hann kom svo á óvart með því að tala vel um Rondu.

„Ég vissi ekki hver hún var á sínum tíma þannig að ég skil vel að hún hafi verið fúl. Ég vil óska henni og UFC til hamingju. Þau hafa náð frábærum árangri og hún var vel að þessum verðlaunum komin."