Finnur: Eigum enn inni þennan draumaskotleik

Íslenska körfuboltalandsliðið hefur tapaði fyrstu þremur leikjum sínum á Evrópumótinu í Berlín. Liðið tapaði naumlega á móti Þýskalandi og Ítalíu en fékk svo skell á móti Evrópumeistaraefnum í Serbíu.

„Við vissum það að þegar við komum inn í þetta mót að við værum að fara að spila á móti gríðarlega sterkum þjóðum. Serbar lenda í öðru sæti á heimsmeistaramótinu í fyrra og tapa þar á móti Bandaríkjamönnum. Þetta var því enginn smá andstæðingur sem við vorum að mæta," sagði Finnur Freyr Stefánsson, aðstoðarþjálfari íslenska liðsins eftir Serbíuleikinn í gær.

„Þeir eru gríðarlega góðir í körfubolta og létu okkur oft líta illa út en á sama tíma þá fengum við okkar skot. Við hengum lengi inn í leiknum og ef að við hefðum hitt á þennan draumaskotleik sem við vitum að getum þá hefði leikurinn þróast aðeins öðruvísi og við mögulega verið inn í honum allt til loka," sagði Finnur.

Íslenska liðið var tíu stigum undir í hálfleik en tapaði seinni hálfleiknum með 19 stigum, 51-32.

„Ég held að það hafi verið komin svolítil þreyta í liðið í seinni hálfleik. Þeir stýrðu okkur svolítið vel í hvað við gerðum. Við vorum að tapa boltanum svolítið klaufalega og fáum einhver 26 stig á okkur í hraðaupphlaupum eftir tapaða bolta. Það er erfitt á móti svona góðu liði og eitthvað sem góð lið gera er að þau refsa manni þegar maður gerir mistök," sagði Finnur.

„Við vorum að fá opin skot á móti gríðarlega sterku serbnesku liði. Við látum skotklukkuna renna út tvisvar í röð í fyrri hálfleik sem er fáheyrt á móti jafnsterku liði. Við þvinguðum líka fimmtán tapaða bolta hjá þeim í fyrri hálfleik. Það er margt jákvætt en auðvitað er svekkjandi að tapa," sagði Finnur.

Framundan eru tveir leikir á tveimur dögum og sá fyrri er á móti Spánverjum í kvöld.

„Hausinn má ekki fara niður núna. Það var klár mikill getumunur og mér finnst mikill munur á Serbum annarsvegar og Þjóðverjum og Ítölum hinsvegar," sagði Finnur.

„Serbía var eitt af þessum liðum sem við vorum ekki búnir að reikna með að fá mikið úr leiknum gegn þeim. Á sama tíma gáfum við allt í þetta og með smá heppni og þessum draumaskotleik sem ég trúi að við eigum inni þá held ég að leikurinn hafi getað farið öðruvísi," sagði Finnur að lokum.