Norrænir tónar í öndvegi

„Við búum dreift og tökum því tónleikahaldið í skorpum,“ segir Jónína Erna Arnardóttir, píanókennari í Borgarnesi, um spilamennsku Trio DaNoIs sem hún, hin danska Pern­ille Kaarslev og Norðmaðurinn Morten Fagerli skipa.

Tríóið heldur tónleika í Háteigskirkju á morgun klukkan 16, var með eina í Borgarnesi á fimmtudag og tvenna í Danmörku í vikunni. Á efnisskrá eru meðal annars verk eftir Edvard Grieg, Pál Ísólfsson, Carl Nielsen og Christian Sinding.

„Við höfum fengið tvö tónskáld til að semja fyrir okkur, Tryggva Baldvinsson og hinn norska Morten Gaathaug. Verkið hans Mortens verður frumflutt hér á Íslandi á morgun en við erum búin að spila það á hinum Norðurlöndunum,“ segir Jónína.

Tónlistarfólkið kynntist við nám við Griegakademiet í Bergen á 10. áratugnum. Kaarslev spilar á horn, hún býr og starfar í Bergen, Fagerli er píanóleikari eins og Jónína og býr í Ósló. Jónína segir tríóið hafa fengið jákvæð viðbrögð hjá áheyrendum. „Samsetningin er dálítið sérstök en býður upp á fjölbreytni og píanóleikurinn verður kraftmikill, þegar við spilum fjórhent,“ segir hún. „Svo kynnum við alltaf verkin á líflegan hátt.“