Leikur mjög ákveðna ömmu sem mildast með tímanum

Hver er eftirlætis námsgreinin þín í skólanum Hildur?

Mér finnst gaman í öllum fögum en ef ég þarf að velja eitt þá er það íslenska.

Finnst þér gaman að hafa fínt í herberginu þínu? Já, en það er samt ekki mjög oft sem það gerist.

Áttu gæludýr? Ég á kött sem heitir Randver, hann er orðinn 10 ára.

Hvað er það skemmtilegasta sem þú gerir? Það er að dansa, syngja, leika, æfa frjálsar íþróttir, baka og skreyta kökur og vera með vinum og fjölskyldu.

Hvenær byrjaðir þú að læra að syngja? Ég byrjaði í Sönglist þegar ég var í 1. bekk og í kór á svipuðum tíma.

Tekur söngurinn mikinn tíma frá skólanum? Söngurinn hefur ekki tekið mikinn tíma frá skólanum, en Jólaleikrit Borgarbarna er oft sýnt á skólatíma og þá þarf ég að fá frí.

Ég hef líka tekið þátt í tveimur sýningum með Íslensku óperunni sem voru oft búnar mjög seint á kvöldin og þá þurfti ég stundum að fá frí í fyrstu tímunum.

Hvað ertu að æfa núna og hvernig er hlutverkið þitt? Núna erum við að æfa Jólaleikrit Borgarbarna sem verður frumsýnt á morgun í Iðnó klukkan sex.

Karakterinn minn heitir amma Bettý og hún er mjög ákveðin og getur verið mjög ströng. Hún verður þó mildari með tímanum.

Hver er uppáhalds söngvari/söngkona? Það er örugglega Taylor Swift og Meghan Trainor.

Var Sigvaldi Kaldalóns læknir og tónskáld forfaðir þinn? Hann var langa langafi minn. Svo voru báðir afar mínir kórstjórar, pabbi spilar á nokkur hljóðfæri og mamma er söngkennari svo það er mikil tónlist í fjölskyldunni.