Mæðir á margra barna mæðrum

„Þar sem ég ströglaði við að komast í báða sokkana fyrir hádegi, greiða mér og fá mér að borða sitjandi fór ég sífellt oftar að hugsa um hvernig í ósköpunum konur færu að með fleiri og jafnvel miklu fleiri börn,“ segir Sigrún Ósk Kristjánsdóttir, sem fer af stað með nýja þáttaröð, Margra barna mæður, á morgun.

Sigrún segir hugmyndina að þáttunum hafa sprottið í kjölfar þess að hún eignaðist sitt annað barn. „Ég eignaðist tvö börn á frekar stuttum tíma, en seinna barnið lét hafa frekar mikið fyrir sér fyrsta árið.“

Smám saman fór Sigrún Ósk að átta sig á að hún væri með efnivið í höndunum og að eflaust væru fleiri að velta þessum spurningum fyrir sér.

„Ég bara varð að komast að hvernig fleiri barna mæður gerðu þetta allt,“ bætir hún við. 

Úr varð að Sigrún Ósk lagðist í rannsóknarvinnu og leitaði á náðir kvenna sem eiga það sameiginlegt að eiga mörg börn, og fékk hún að fylgjast með þeim daglangt í leik og starfi.

Níu börn, átta þeirra undir fermingaraldri 

Þær konur sem Sigrún Ósk tók tali eiga á bilinu fimm til tíu börn.

„Sem dæmi um fjölskyldu sem ég sæki heim er ellefu manna fjölskylda á Eyrarbakka. Þar eru níu börn, og átta þeirra eru á fermingaraldri og undir,“ segir Sigrún og bætir við að ákvörðun hafi verið tekin um að tjónka ekki við móður náttúru í þessum efnum. 

„Það merkilegasta við þá heimsókn var hve áreynslulaust þeim fór þetta viðamikla verk úr höndum,“ segir Sigrún Ósk gáttuð. Það kom Sigrúnu einmitt einna mest á óvart hve jarðbundnar og afslappaðar mæðurnar raunverulega eru, þvert á það sem hún hafði upphaflega gefið sér. 

„Í fyrsta þætti sem sýndur verður á morgun, mun ég heimsækja fjölskyldu sem ákvað að bæta við sig einu barni eftir að hafa eignast tvíbura. Í því kasti reyndust þríburar svo þar voru komin fimm börn á afar stuttu tímabili,“ segir Sigrún sem hefur fengið svör við spurningum sínum, þó þær mæður sem hún talaði við hafi sannarlega látið þetta líta út fyrir að vera lítið mál.

„Ég á nokkrar nýjar fyrirmyndir í lífinu eftir gerð þessara þátta,“ segir Sigrún að lokum.