Ævintýri um alla borg

Öllum fjórða bekkjar börnum úr grunnskólum Reykjavíkur, um 1.550 talsins, er boðið á opnunarhátíð Barnamenningarhátíðarinnar í Eldborgarsal Hörpu sem hefst klukkan 11 á morgun, 21. apríl.

Þar býður Íslenski dansflokkurinn börnum úr Klettaskóla í dans áður en Dagur Eggertsson borgarstjóri ávarpar gesti.

Eftir meiri dans leikur fiðlusveit Tónskóla Sigursveins lög úr James Bond-myndum og Mamma Mia og síðan stígur Salka Sól á svið og syngur lagið Það sem skiptir mestu máli, sem einmitt 4. bekkjar börnin áttu stóran þátt í að semja textann við.

Upp úr hádeginu eiga leikskólabörnin sviðið í Eldborg er þau frumflytja, ásamt forskólanemendum Tónskóla Sigursveins, gullfalleg lög Tryggva M. Baldvinssonar við undirleik atvinnutónlistarmanna. Sú dagskrá nefnist Ég fæddist í landi sem lifir. Allir eru velkomnir á þann viðburð.

Upptakturinn er frumflutningur verka sem ungt fólk samdi með aðstoð tónskálda og leikin eru af listamönnum. Hann hefst klukkan 17 á morgun í Kaldalóni í Hörpu og í sama sal, sama dag, verður Drullumall – unglingatónleikar frístundamiðstöðvarinnar Kamps sem hefjast klukkan 19.30 og standa til 22.

Assitej Ísland setur sviðslistahátíð fyrir börn í Ráðhúsi Reykjavíkur með litríkri opnunarathöfn klukkan 16.30 á morgun. Þaðan verður gengið yfir í Tjarnarbíó sem verður miðstöð sviðslistahátíðarinnar.

Í Iðnó verður starfrækt barnamenningarhús næstu daga undir nafninu Ævintýrahöllin. Þar eiga allir að geta fundið eitthvað við sitt hæfi og Ráðhús Reykjavíkur setur upp þrjár spennandi listasýningar.

Leikskólar borgarinnar, RÚV, Sjóminjasafnið, Laugarnesskóli, Félagsmiðstöðin Dregyn í Grafarvogi, Myndlistarskóli Reykjavíkur, Laugardalslaugin og Sambíóin Álfabakka eru meðal þeirra sem bjóða hinu mikilvæga fólki á aldrinum tveggja til sextán ára upp á eitthvað skemmtilegt í vikunni í tilefni hátíðarinnar.

Borgarbókasafnið og Listasafn Íslands láta heldur ekki sitt eftir liggja heldur verða með ótal viðburði.