Hjarta sýningarinnar er í söngljóðum Jónasar Árnasonar

„Við segjum söguna af heimsókn ævintýramannsins Jörgens Jörgensens til Íslands 1809 á gamansaman hátt.

Hjarta sýningarinnar eru þó söngljóð Jónasar Árnasonar um hundadagakonunginn og eins er mikið myndefni frá þessum tíma,“ segir Edda Þórarinsdóttir leikkona um kabarettinn Leitin að Jörundi sem hún er höfundur að.  Segir líka brot flutt úr nokkrum lögum sem tengja söguna nútímanum.

Kabarettinn var sýndur sex sinnum við góðar undirtektir síðasta haust en vegna anna flytjenda varð hlé á sýningum. Nú hefjast þær aftur og eru fyrirhugaðar sunnudagana 3., 10. og 17. maí klukkan 20.

Flytjendur kabarettsins eru hljómsveitin Fjögur á palli; Edda Þórarinsdóttir, Karl Olgeirsson, Magnús Pálsson og Páll Einarsson, ásamt leikaranum Baldri Trausta Hreinssyni.

„Við bjóðum upp á kaffihúsastemningu með dillandi tónlist og góðu gríni,“ segir Edda.

Jörgen Jörgensen var rekinn úr skóla 14 ára gamall, yfirgaf Danmörku og fór til Bretlands. Árið 1809 sigldi hann með sápuframleiðandanum Samuel Phelps til Íslands að kaupa lýsi og tólg.

Hann gerði byltingu á Íslandi gegn dönskum yfirvöldum sem höfðu meinað Íslendingum að versla við útlendinga, tók sér konungsvald og ríkti yfir Íslandi í tvo mánuði.