Kristján og Diddú syngja fyrir vinafélagið

Nýstofnað vinafélag Söngskóla Sigurðar Demetz heldur sína fyrstu skemmtun í upphafi ársins 2016 með stórtónleikum í Iðnó, þriðjudaginn 5. janúar, þar sem fram koma valinkunnir söngvarar, ásamt kennurum við skólann og nemendum. Húsið er opnað kl. 20 en tónleikarnir byrja kl. 20.30

Meðal þeirra sem koma fram eru: Kristján Jóhannesson, Lilja Guðmundsdóttir, Kristinn Thor Schram Reed og Jóhann Schram Reed sem öll hafa stundað nám við skólann. Þá koma fram tveir af kennurum skólans, þau Kristján Jóhannsson og Sigrún Hjálmtýsdóttir – Diddú. Einnig koma fram tveir nemendur skólans, þær Lísa Mary Viðarsdóttir og Anna Guðrún Jónsdóttir og leika Guðrún Dalía og Snorri Sigfús Birgisson með listamönnunum á píanó. Kynnir verður Ævar Kjartansson. Að auki verður sérstakur leynigestur sem gert hefur garðinn frægan síðustu ár.

Tilgangur vinafélagsins er að styðja á ýmsan hátt við Söngskóla Sigurðar Demetz, en ekki síður að heiðra minningu Sigurðar Demetz sem var fyrsti verndari skólans. Verður það gert með ýmsum viðburðum og eru þessir tónleikar þeir fyrstu eftir stofnun skólans.

Allir eru velkomnir í vinafélag Söngskóla Sigurðar Demetz og stuðla með því að eflingu söngmenntunar og viðburða skólans. Vinir Sigurðar Demetz eru sérstaklega boðnir velkomnir í félagið.

Ókeypis er á tónleikana fyrir félaga í vinafélaginu en hægt er að ganga í það á staðnum. Árgjald er 5.000 krónur fyrir einstaklinga en 6.000 krónur fyrir hjón/pör. Námsmenn greiða hálft gjald og vonast vinafélagið til að sjá sem flesta á skemmtuninni.