Bowie ber ábyrgð á svanakjól Bjarkar

Björk segir að það hafi verið fyrir áhrif frá David Bowie að hún ákvað að vera í frægum svanakjól sínum við Óskarsverðlaunaafhendinguna.

Tónlistarkonan Björk biður þess að David Bowie megi hvíla í friði en upplýsir jafnframt að það hafi verið Bowie sem einkum og sérílagi ber ábyrgð á því að hún klæddist hinum fræga svanakjóli sínum við Óskarsverðlaunaafhendinguna árið 2001.

Ástæðan má heita frumleg, Björk segir að Bowie hafi alltaf sagt við sig eitthvað á þá leið að hann hafi alltaf velt því fyrir sér hvernig hún liti út sem fugl sem væri að verpa.

„RIP David Bowie. It is true that he was the one who inspired me to wear my swan dress at the Academy Awards. He told me "I always wondered what you would look like as a bird laying eggs.“ Svo segir Björk á sinni Facebooksíðu. Fjöldi Íslendinga, líkt og öll heimsbyggðin, hefur grátið Bowie í vikunni en nú er sem sagt komið á daginn að það má kenna honum um það að óskabarn þjóðarinnar fetaði rauða dregilinn klædd hinum umdeilda svanakjól, eða þakka – eftir atvikum.

Eins og þeir vita sem fylgjast með Óskarsverðlaunaafhendingunni tengist hátíðinni mikið stóð tískufólks sem veit fátt merkilegra í lífinu og tilverunni en mæna í kjóla þeirra frægðarkvenna sem mæta á verðlaunaafhendinguna. Kjóll Bjarkar vakti á sínum tíma gríðarlega athygli, hneykslan margra en var, í mikilli úttekt og könnun Debenhams, sem birt var í The Daily Telegraph 2008, kosinn níundi minnisstæðasti kjóll sem nokkur hefur klæðst á rauða dreglinum.