Ég reyni að synda á móti straumnum og ala sjálfa mig upp

Myndlistarkonan Jónborg Sigurðardóttir – Jonna opnar sýninguna Völundarhús plastsins í Listasafninu á Akureyri á laugardaginn klukkan 15. Þar er um innsetningu að ræða, ætlaða til að gera áhorfendur meðvitaða um umhverfisáhrif plastnotkunar.

„Það er alltof mikið af plasti úti um allt og í öllu. Fólk notar plastpoka hugsunarlaust og hendir þeim svo kannski í ruslið eftir 20 mínútna notkun,“ segir listakonan. Hún kveðst reyna að synda á móti straumnum og ala sjálfa sig upp í umhverfisvitund.

„Ég hef verið að lesa mikið um plastmengun og hún er rosaleg. En ég er lítið peð sem get lagað mína neyslu og ég vil vekja áhuga á því sama hjá öðrum,“ segir hún og lýsir vinnuaðferðum sínum á sýningunni. „Ég hef verið að klippa niður plast og prjóna úr því og bý líka til völundarhús úr plasti sem hægt er að labba inni í. Svo yrki ég örljóð á plastbrúsa.

Meðan á sýningunni stendur verð ég á staðnum, held mig í lítilli kompu og vinn listaverk úr notuðu plasti með ýmsum hætti. Til dæmis ætla ég að búa til skrímsli úr plastinu.“ 

Jonna útskrifaðist fyrir 20 árum úr fagurlistadeild Myndlistaskólans á Akureyri og sinnti listinni lengi vel með vinnu og barnauppeldi en síðustu þrjú árin kveðst hún hafa verið mjög virk.

Völundarhús plastsins er tveggja vikna sýning. „Það er sama hvort sýningin stæði í þrjá daga, tvær vikur eða einhverja mánuði, ég legði jafn mikla vinnu í hana, því þetta er það sem ég vil láta frá mér,“ segir Jonna. „Skilaboðin mín eru að hætta að nota plastpoka.“