Ráðuneytið áætlar að endurgreiða 520 milljónir vegna Fast 8

Atvinnuvega- og nýsköpunarráðuneytið gerir ráð fyrir 300 milljóna króna hækkun á endurgreiðslum vegna kvikmyndagerðar hér á landi í ár. Þetta kemur fram greinargerð frumvarps iðnaðar- og viðskiptaráðherra, Ragnheiðar Elínar Árnadóttur, um breytingu á lögum um tímabundnar endurgreiðslur vegna kvikmyndagerðar á Íslandi en verði það að lögum mun endurgreiðsluhlutfallið hækka úr 20 prósentum í 25 prósent. RÚV sagði fyrst frá innihaldi frumvarpsins.

Er þessi hækkun rakin til óvenju stórra verkefna hér á landi í ár og er sjónvarpsþáttaserían Ófærð og kvikmyndin Fast 8 sérstaklega tilgreind í greinargerðinni.

Sjá einnig: Fréttaskýring: Svarti sandurinn kveikti áhuga Hollywood á Íslandi

Fast 8 fær 520 milljónir í endurgreiðslu 

Áætlar ráðuneytið að verja 1,3 milljörðum króna vegna endurgreiðslna úr ríkissjóði en þar af eru um 40 prósent vegna stórmyndarinnar Fast 8. Það þýðir að Fast 8 mun fá 520 milljónir króna úr ríkissjóði. Sé miðað við að 520 milljónirnar séu 20 prósenta endurgreiðsla vegna framleiðslukostnaðar hér á landi má áætla að heildarkostnaður við tökur á myndinni hér á landi nemi 2,6 milljörðum króna.

Sjá einnig: Leikstjóri Fast 8 birtir myndir af upptökustað

Í greinargerð frumvarpsins kemur fram að endurgreiðslurnar til Fast 8 séu um 75 prósentum hærri en endurgreiðslur þess verkefni sem næst því kemst í umsvifum frá því endurgreiðslukerfinu var komið á. Má því áætla að endurgreiðslur vegna þess verkefnis hafi numið tæpum 300 milljónum króna.

Latibær og Walter Mitty

Á vef Kvikmyndamiðstöðvar Íslands má finna tölur um endurgreiðslur frá árinu 2001 til ársins 2015. Aðeins er hægt að skoða hversu mikið ríkið endurgreiddi frá árunum 2001 til 2011 en frá 2012 til ársins 2015 er hægt að sjá hversu mikið einstök verkefni fengu.

Samkvæmt þeim lista hefur fjórða sería Latabæjar fengið hæstu endurgreiðsluna, 288 milljónir króna, en kvikmyndin The Secret Life of Walter Mitty fékk 275 milljónir króna árið 2014. Má því reikna með að kostnaður vegna framleiðslu á Ben Stiller-myndinni hafi numið 1.375 milljónum króna.

200 milljónir í Ófærð

Í frumvarpi ráðherra kemur fram að áætlaðar endurgreiðslur vegna Ófærðar nemi 200 milljónum króna en má því áætla að kostnaðurinn við framleiðslu þáttaraðarinnar í fyrra hafi numið um einum milljarði króna.

1,3 milljarðar 

Í greinargerðinni kemur fram að gert sé ráð fyrir 1.137 milljónum króna til endurgreiðslna vegna kvikmyndagerðar á Íslandi, en þar af eru um 30 milljónir króna rekstrarkostnaður. Nemur því endurgreiðslan um 1.107 milljónum og bætist þar við 300 milljóna króna tímabundin hækkun vegna væntanlegra verkefna.

Þá  kemur fram að ekki sé ástæða til að ætla að þessi upphæð, 1,3 milljarður króna, gefi rétta mynd af endurgreiðslum framtíðarinnar en meðaltalið sé um 950 milljónir króna á ári. Á þeim forsendum myndi 25 prósenta hækkun nema um 240 milljónum króna og heildarkostnaðurinn við endurgreiðslur um 1.200 milljónir króna á ári.

Það er því mat atvinnuvega- og nýsköpunarráðuneytis að verði frumvarpið óbreytt að lögum megi gera ráð fyrir að kostnaður vegna endurgreiðslna vegna kvikmyndagerðar á Íslandi verði um 1.200 milljónum króna árið 2017 sem er um 60 milljónum krónum hærra en framlag fjárlaga ársins 2016.

Noregur hækkaði í 25 prósent

Er bent á að þrátt fyrir að sótt hafi verið um endurgreiðslur á árinu 2016 sem nema hærri fjárhæð en framlag ársins er það þó alveg ljóst að ekki verður greitt meira en sem nemur fjárveitingu Alþingis. Er bent á lagaeimildir ráðherra til að fresta endurgreiðslum sem kunna að vera umfram fjárveitingar Alþingis hverju sinni.

Helsta ástæðan fyrir hækkuninni er sögð til að tryggja að Ísland verði áfram samkeppnishæft sem tökustaður kvikmynda, og efli þannig innlenda menningu og kynningu á sögu lands og náttúru. Er nefnt að í janúar 2016 tóku í gildi lög um endurgreiðslur vegna kvikmyndagerðar í Noregi. Kerfið líkist íslenska kerfinu að miklu leyti en  hlutfall endurgreiðslunnar er 25 prósent.