Kusk á hvítflibbann

Breski smásölukóngurinn Sir Phillip Green hefur undanfarin misseri fengið kusk á hvítflibbann vegna sölu á stórverslanakeðjunni BHS. Green seldi verslanakeðjuna í mars í fyrra á málamyndaupphæð, eitt sterlingspund, og nú rétt ríflega ári síðar er hún gjaldþrota.

Illar tungur í breska smásölugeiranum segja augljóst að Green hafi selt BHS með það eitt að markmiði að vera ekki við stjórnvölinn þegar stórverslanakeðjan færi loks í gjaldþrot. Það hefur nefnilega legið fyrir í allnokkur ár að BHS sé varla viðbjargandi.

Félagið, sem rekur um 170 verslanir víðsvegar um Bretland, var í eigu Green í 15 ár. Kaupverðið á sínum tíma var ríflega 200 milljónir punda en hann hefur náð því margfalt út úr félaginu með arðgreiðslum, leigutekjum, þóknunum og svo framvegis. Síðustu ár hafa hins vegar ekki verið björt fyrir félagið, það tapar um tuttugu milljónum punda á ári og hefur verið að sligast vegna gríðarlegra lífeyrisskuldbindinga.

Nú fyrr í mánuðinum kom loksins að skuldadögum og spilaborgin hrundi með braki og brestum.

Sá sem keypti af Green fyrir réttu ári var Dominic nokkur Chapp­ell, en sá var með öllu óþekktur í smásölugeiranum þegar kaupin áttu sér stað. Hann hafði þó unnið nokkur afrek sem kappaksturssölumaður, og hlotið dóm fyrir fjármálamisferli. Hvorugt þótti benda til þess að hann gæti bjargað BHS.

Margir töldu að Green hefði handvalið hann til að sigla skútunni í strand.

Á þessu rétta ári síðan Chappell keypti félagið á eitt sterlingspund hefur honum þó tekist að ná talsverðu fé út úr félaginu, en samkvæmt fregnum hefur nýju eigendunum tekist að ná um það bil 25 milljónum punda út úr rekstrinum. Svo virðist sem það borgi sig að halda sokknu fleyi á floti.

Hvað Green varðar þá er sagan ekki öll sögð enn. Hann hefur hlotið afar slæmt umtal af, og þingmenn í breska þinginu hafa meira að segja krafist þess að hann verði sviptur riddaratign. Þeir sem til þekkja segja að það væri mikið persónulegt áfall fyrir Green, enda er hann þekktur fyrir að vera annt um ímynd sína sem götusölumaðurinn sem braust til æðstu metorða.

Sú ímynd er nú í hættu.

Stjórnarmaðurinn er sigldur innherji með puttann á púlsinum. Stjórnarmaðurinn skrifar í Markaðinn í Fréttablaðinu á miðvikudögum og liggur ekki á skoðunum sínum um menn og viðskiptaleg málefni.