GPS stríðir fleiri ferða­mönnum en Noel: Ætluðu í Þórs­mörk en enduðu í grill­veislu hjá Þór

„Þetta var bara til að gera daginn skemmtilegri,“ segir Þór Þorsteinsson á Skálpastöðum II í Borgarfirði. Þór og Guðrún Björk kona hans voru með matarboð og í óðaönn að grilla lambakjöt þegar bankað var upp á. Til þeirra var mætt bandarískt par sem hafði ætlað sér að upplifa íslensku náttúruperluna Þórsmörk. 

Misskilning parsins má rekja til þess hve mjög þau treystu á GPS-tækið sem þau höfðu meðferðis og brunuðu af stað. Þannig er mál með vexti að eitt túnanna við Skálpastaði ber nafnið Þórsmörk og er sagan af því hvernig túnið fékk það heiti skemmtileg. Gefum Þór orðið:

„Sem ungur drengur smíðaði ég forláta fótboltamörk úr timbri á einu túni hérna í sveitinni. Til að þurfa ekki að sækja boltann eins langt setti ég net í mörkin, leifar af einhverri gamalli loðnunót. Síðan var spilaður fótbolti þar til kom að því að slá þurfti túnið. Þá var mér skipað að fjarlægja mörkin sem ég sannarlega gerði. Einhverjar leifar af loðnunótinni urðu hinsvegar eftir og lentu þær að sjálfsögðu í sláttuvélinni. Það tók það sem eftir var af deginum og fram undir morgun að losa netið úr sláttuvélinni og ekkert slegið á meðan.

Pabbi var ekki sérlega ánægður með strákinn sinn þennan dag og var starfskrafta minna við að losa netið úr vélinni ekki óskað.

Túnið hafði ekkert eiginlegt nafn þegar þetta gerðist ólíkt flestum öðrum túnum á bænum. Það var hluti af Goðalöndunum svokölluðum sem voru í raun fjögur tún og var kallað Efsta Goðaland. Þegar pabbi var búinn að jafna sig á þessum mistökum mínum og sláttur aftur kominn á fullt skrið fékk túnið loksins nafn.

Þórsmörk.

Nafngiftinni var sennilega ætlað að sjá til þess að ég myndi aldrei gera önnur eins mistök aftur.“

Framtakssemi eldri borgara í Borgarfirði hefur orðið til þess að túnið Þórsmörk er nú auðfundið með aðstoð GPS-tækja. Þannig hefur hópur eldri borgara skráð örnefni á svæðinu samviskusamlega í samstarfi við Landmælingar Íslands. Er túnið því komið í kortagrunn Landmælinga.

Víkur þá sögunni að bandaríska parinu sem bar að garði seinni partinn í gær. Guðrún Björk lýsir því þannig að parið hafi staðið í vegkantinum og horft yfir Grímsá. Þau hafi sagt hvort við annað: „Is this Þórsmörk? Is this the river we should cross?“ og væntanlega talið að um sjálfa Krossá væri að ræða.

Bandaríska parið hafði mikinn húmor fyrir mistökum sínum að sögn Þórs. Hann hafi „að sjálfsögðu“ boðið þeim í mat og greinilegt að gestrisni vantar ekki hjá þeim Guðrúnu og Þór. Parið var frá Utah í Bandaríkjunum og má telja líklegt að heimsóknin til þeirra Þórs og Guðrúnar, þar sem lambakjöt var grillað, hafi verið hápunkturinn á Íslandsdvölinni.

Hafa verður í huga að straumur ferðamanna til landsins í ár er rétt að hefjast fyrir sumarsprengjuna sem er rétt handan við hornið. Það ætti því ekki að koma neinum á óvart ef fleiri ferðamenn á leið í Þórsmörk rata í Borgarfjörðinn.

„Ég ætla bara að fara að selja inn,“ segir Þórs hlæjandi og hefur greinilega gaman af.

Mikla athygli vakti þegar bandaríski ferðamaðurinn Noel Santillan ætlaði að gista á Hótel Frón á Laugavegi í febrúar en endaði á Siglufirði. Ástæðuna mátti rekja til þess að á Siglufirði er að finna götuna Laugarveg, með r-i, en Siglfirðingar tóku Noel fagnandi og sömuleiðis Reykvíkingar þegar hann mætti nokkrum dögum á eftir áætlun í höfuðborgina.