Fín veiði í Laxá í Kjós

Laxá í Kjós fór ágætlega af stað og hefur haldið dampi frá fyrsta degi en það er aðeins eitt sem veiðimenn bíða eftir þar á bæ.

Það hefur lítið rignt í Kjósinni en þrátt fyrir það er veiðin núna um það bil tvöfalt hærri en hún var á sama tíma í fyrra.  Núna er komnir 123 laxar á land og það sem er sérstaklega gleðilegt fyrir veiðimenn í Kjósinni er að sjá hversu gott stórlaxahlutfallið er í ánni en töluvert af 80-90 sm löxum og mest af því eru hængar sem þykir heldur óvenjulegt fyrir árstíma en venjulega er meira af hrygnum sem taka fyrst á tímabilinu.

Sjóbirtingsgöngurnar eru hafnar og hafa komið í bland við smálaxagöngur sem gerir það að verkum að mikið líf er á neðstu svæðunum í ánni og á frísvæðinu en þar veiðist gjarnan mest af sjóbirtingnum.  Í gærkveldi var dreginn 91 cm hængur úr Efri-Gljúfrum og er það fjórði laxinn yfir 90 cm þetta árið og þar að auki hafa nokkrir laxar sýnt sig og sést í hyljum Laxár sem veiðimenn fullyrða að séu vel 20 punda laxar.