Svekkjandi tap en mögnuð frammistaða

Íslenska tuttugu ára landsliðið í körfubolta lék í kvöld til úrslita í B-deild Evrópukeppni U-20 karla í körfubolta og mætti liðið Svartfjallalandi. Ísland tapaði leiknum 78-76 eftir framlengdan leik.

Svartfellingar byrjuðu leikinn betur og höfði lengi vel þægilegt forskot en íslensku strákarnir gáfust aldrei upp og náði að koma sér aftur inn í leikinn í fjórða leikhlutanum. 

Þegar örfáar sekúndur voru eftir af venjulegum leiktíma var staðan 71-68 fyrir Svartfellinga. Þá gerði Kristinn Pálsson sér lítið fyrir og setti niður þriggja stiga skot og tryggði liðinu framlengingu. 

Í henni voru Íslendingarnir sprækir og gáfu ekkert eftir. Þegar sjö sekúndur voru eftir af framlengingunni, í stöðunni 78-76, fékk íslenska liðið tækifæri til að jafna metin eða gera út úm leikinn en allt kom fyrir ekki og Svartfellingar stóðu uppi sem sigurvegarar. 

Íslenska liðið sló heimamenn í Grikklandi út í gærkvöldi eftir magnaðan leik.

Jón Axel Guðmundsson var frábær í liði Íslands og skoraði 23 stig. Pétur Rúnar Birgisson var með 17 stig og Kári Jónsson 14 stig í kvöld. 

Hér má sjá tölfræðiupplýsingar um leikinn.