Rússarnir áttu ekki svör við íslensku geðveikinni

Íslensku landsliðin halda áfram að vera stóru þjóðunum skeinuhætt eins og Davíð á móti Golíat. Þetta hafa þau sýnt síðustu árin og litla Ísland minnti enn á ný á sig á alþjóðlegum vettvangi um síðustu helgi.

Ísland er með í Evrópukeppni undir tuttugu ára liða á ný í körfunni og á laugardaginn vann liðið Rússa 71-65. Bestu úrslit Íslands á móti Rússum fyrir þennan sögulega leik var 16 stiga tap og Rússarnir voru einmitt komnir sextán stigum yfir eftir fyrsta leikhlutann. Strákarnir sýndu úr hverju þeir eru gerðir, komu til baka og urðu fyrstir íslenskra liða til að vinna Rússa í körfubolta.

Nauðsynlegt skref

Finnur Freyr Stefánsson, þjálfari Íslandsmeistara KR undanfarin þrjú ár, er þjálfari liðsins. „Það er bara frábært að við séum að keppa aftur á Evrópumóti undir 20 ára og þannig að reyna að brúa bilið á milli yngri landsliðanna og A-landsliðsins. Þetta er nauðsynlegt skref. Það er líka ekki oft sem við fáum tækifæri til að keppa á móti Rússum. Liðunum var fækkað í A-deild. Rússland, Króatía, Grikkland, Pólland, Bosnía og Svartfjallaland féllu öll í B-deildina og B-deildin er því mjög sterk í ár,“ segir Finnur.

Sjokk í fyrsta leik

Íslenska liðið tapaði fyrsta leik sínum en hefur síðan svarað með sigrum á Rússum og Eistum. „Hvít-Rússaleikurinn var svolítið sjokk fyrir liðið og þá sérstaklega upp á varnarleikinn að gera. Við vorum betur undir það búnir á móti Rússunum. Við duttum betur í gírinn þegar leið á leikinn. Við fórum í þessa íslensku geðveiki sem við höfum alltaf talað um hjá A-landsliðinu. Það var bara að kýla á þetta og spila hratt og reyna með því að sprengja upp leikinn,“ segir Finnur. Í liði hans eru strákar sem voru í stórum hlutverkum hjá meistaraflokkum sínum undanfarin tímabil.

Skemmtilega samsett lið

„Þeir eru klárir í slaginn, eru ekkert hikandi eða smeykir. Þeir eru ákveðnir og hræðast ekki neitt. Það er munur að vera með stráka sem eru vanir að spila á móti fullorðnum karlmönnum þó að varnarleikurinn hérna sé svolítið öðruvísi en við erum vanir heima. Þetta er mjög skemmtilega samsett lið og strákar sem lofa góðu fyrir framtíðina,“ segir Finnur.

Átta þeirra eru í æfingahóp A-landsliðsins og þar er Finnur aðstoðarþjálfari. Er þetta ekki bara ein stór áheyrnarprufa hjá þessum strákum? „Jú, að sjálfsögðu. Við ætlum síðan að sjá hvernig strákarnir koma inn í prógrammið heima þegar þeir koma til baka eftir mótið. Stóri hópurinn byrjar að æfa í vikunni en við komum heim á mánudaginn og strákarnir byrja að æfa fljótlega eftir það. Það verður mjög athyglisvert að sjá hvernig þeir standa miðað við þessa karla heima eftir þetta mót,“ segir Finnur. A-landsliðið keppir í undankeppni EM í haust þar sem liðið reynir að komast á sitt annað Eurobasket-mót í röð.

Geta tekið við keflinu

Finnur segir að í 20 ára liðinu séu leikmenn sem geti náð langt. „Ég sé fyrir mér í framtíðinni að hér séu strákar sem eru klárir í það að taka við keflinu af eldri strákunum í A-landsliðinu. Þeir þurfa að hugsa um það að leggja hart að sér áfram. Þeir eru gríðarlega góðir og hafa staðið sig vel heima en þeir eiga enn þá mikið verk fyrir höndum ef þeir ætla að komast í fremstu röð. Það er núna bara í þeirra höndum hversu langt þeir vilja ná, hversu mikið þeir eru tilbúnir að leggja á sig því hæfileikarnir eru klárlega til staðar,“ segir Finnur.

Íslenska liðið fékk tveggja daga hvíld en mætir Póllandi í dag þar sem sigur tryggir liðinu sæti í átta liða úrslitum.