Fullt hús hjá lærisveinum Dags

Þýska handboltalandsliðið landaði öðrum góðum sigri á Ólympíuleikunum í dag er það spilaði gegn Póllandi.

Þjóðverjar sterkari frá upphafi og leiddu með tveim mörkum í leikhléi, 16-14. Það forskot gáfu þeir aldrei af hendi og unnu að lokum sanngjarnan sigur, 32-29.

Þjóðverjar eru því búnir að vinna báða leiki sína á mótinu en Pólverjar eru í vondum málum eftir að hafa tapað báðum sínum leikjum á leikunum.

Uwe Gensheimer og Fabian Weide voru markahæstir í liði Þýskalands með fimm mörk. Andreas Wolff var óvenju rólegur í marki Þjóðverja og varði aðeins sjö skot. Hann skoraði þó eitt mark.

Karol Bielecki átti stórleik hjá Pólverjum og skoraði tíu mörk. Það skilaði þó engu að lokum.