Strákarnir hans Dags mæta Katar í átta liða úrslitunum | Þessi lið mætast

Katar varð í nótt síðasta liðið til að tryggja sér sæti í átta liða úrslitum í handbolta karla á Ólympíuleikunum í Ríó.

Katarbúar unnu þá fjögurra marka sigur á Argentínu, 22-18, í leik þar sem jafntefli hefði nægt til að koma þeim í átta liða úrslitin.

Lið Katar mætir Degi Sigurðssyni og lærisveinum hans í þýska landsliðinu í átta liða úrslitunum á miðvikudaginn kemur.

Katarliðið var með frumkvæðið allan tímann, komst strax í 3-0 og var þremur mörkum yfir í hálfleik, 12-9.

Þýska liðið vann B-riðilinn og mætir því liðinu í fjórða sæti í A-riðli sem er Katar eftir þennan sigur á Argentínu.

Guðmundur Guðmundsson, þjálfari danska liðsins, og Dagur Sigurðsson, þjálfari þýska liðsins, geta nú ekki mæst fyrr en í úrslitaleiknum. Vinni Þjóðverjar í átta liða úrslitum mæta þeir annaðhvort Frakklandi eða Brasilíu. Danir mæta annaðhvort Króatíu eða Póllandi slái þeir út Slóveníu.



Átta liða úrslitin í handbolta karla:

Króatía - Pólland

Slóvenía - Danmörk

Frakkland - Brasilía

Þýskaland - Katar