„Förum að gera klaufamistök og klikka á dauðafærum“

„Við spilum fyrstu 20 mínúturnar í leiknum mjög vel og komumst fimm eða sex mörkum yfir. Við spiluðum fantavörn og þær skoruðu held ég tvö mörk á einhverjum 13-14 mínútum,“ sagði Haraldur í leikslok.

„Svo komast þær aðeins inn í þetta og við förum að gera klaufamistök og klikka á dauðafærum. Þær komast inn í leikinn og við erum bara með eitt mark á þær í hálfleik. Svo er þetta bara jafnt. Við missum þær tveimur eða þremur yfir af því að við urðum of passívar í vörninni. Við vorum búnar að standa gríðarlega vel á þær, en féllum aðeins niður. Kannski var smá þreyta eða eitthvað, en leikurinn heilt yfir bara nokkuð góður hjá okkur. Það var komin smá þreyta í seinni hálfleik sem kannski varð til þess að þær komust fram úr okkur,“ bætti Haraldur við.

„Dauðafæri og aulafeilar kannski. Við erum ekki að taka fráköst og svoleiðis.“

Hann segir það súrt að hans lið hafi ekki náð að halda góðu forskoti í það minnsta fram að hálfleik.

„Haukarnir eru þannig lið að þær refsa þér fyrir mistök. Við grípum ekki tvisvar á línunni, klikkum á dauðafæri á línunni og úr hornum og þær keyra á okkur og komast þannig inn í þetta. Það er eiginlega bara málið. Það er náttúrulega landsliðsmarkmaður í markinu hjá þeim og hún er mjög góð og allt það, en við þurfum að nýta dauðafærin betur.“

Markvörður Hauka, Sara Sif Helgadóttir, reyndist Fram-liðinu erfið í kvöld og varði 22 skot.

„Dauðafæri og líka skot fyrir utan og allt það. Við hefðum þurft að skjóta aðeins betur á hana,“ sagði Haraldur. 

„En það var margt gott í þessu sem við getum tekið með okkur í næstu leiki. Við erum að fara í nokkra hörkuleiki í röð og við ætlum að vinna þá. Við ætlum að nýta það sem við gerðum vel í þessum leik og á móti ÍBV, en við ætlum líka að nýta það sem við gerðum ekki nógu vel til að skila sigrum á næstunni,“ sagði Haraldur að lokum.