Sveppir gera góðan mat betri

Sveppir eru eftirsóknarverðir vegna bragðgæðanna, fyrst og fremst. Þeir gera góðan mat betri. Svo eru þeir líka hollir, að mestu leyti trefjar og vatn og með smá af snefilefnum og vítamínum.“ Þetta segir Ása Margrét Ásgrímsdóttir hjúkrunarfræðingur sem fræg er fyrir námskeið og bækur um sveppi í íslenskri náttúru.

„Ég hef haft áhuga á sveppum í um 40 ár. Hann bara kom, hefur vaxið og vaxið og heltekur mig í ágústmánuði,“ lýsir hún og leikur sér að því að nota sveppina á nýstárlegan hátt.

Sveppabrauð

Nota má ferska, frysta eða þurrkaða sveppi.

400 g ferskir sveppir sneiddir smátt. Settir fyrst á þurra pönnu og mesta vatninu sem kemur úr þeim hellt af, þeir eru síðan steiktir í góðri matarolíu.

40 g þurrkaðir sveppir Þá þarf að leggja í bleyti í 1 til 2 tíma fyrst og hella vatninu frá fyrir steikingu. Saltið og piprið örlítið. Látið kólna.



Deig

1 bréf þurrger (11,8 g)

3 dl volgt vatn

1 tsk. salt

1 tsk. hunang

2 msk. ólífuolía

4 dl hveiti fyrir brauðgerð

3 dl heilhveiti

Þurrgerið má leysa upp í volgu vatninu. Einnig má strá gerinu beint út í hveitiblönduna. Blandið saman í hrærivélarskál öllu hráefni, notið hnoðara og hrærið þar til allt er samlagað – mjög stutta stund. Látið rakan klút yfir hrærivélina og látið deigið hefast í 40 mínútur.

Blandið steiktu sveppunum saman við deigið og hnoðið lítillega. Útlitinu getið þið ráðið en ég hnoðaði í litlar bollur sem saman mynda svepp.

Seinni hefun á bökunarpönnu tekur 30 mínútur. Penslið yfir brauðið með olíu og bakið í 20 mínútur við 200° C hita eða þar til brauðið er fullbakað.

Sveppamauk

40 g þurrkaðir sveppir

Furuhnetur 1 pakki (70 g)

1 dl rifinn parmesan-ostur

1 og ½ dl ólífuolía

Salt, pipar og timjan eftir smekk.

Látið sveppina liggja í bleyti í 1 til 2 tíma, hellið vatninu af og steikið sveppina í olíu smá stund. Kryddið með timjan.

Setjið sveppi, furuhnetur og parmesanost í matvinnsluvél og maukið. Hellið olíunni í á meðan vélin gengur, þar til maukið er hæfilega þykkt.

Saltið og piprið eftir smekk.

Quesadilla með sveppum

300 g ferskir sveppir eða handfylli af þurrkuðum sveppum fyrir hverjar 2 tortilla-kökur

1-2 hvítlauksrif

1 rauðlaukur

1 söxuð, fersk steinselja

olía til steikingar

1 pk. villisveppaostur (150 g)

1 pk. tortilla-heilhveitikökur, minni gerðin (það eru 8 kökur í pakka)

1 egg pískað í skál

Salt og pipar og annað krydd að vild en samt í hófi svo sveppabragðið njóti sín. Það má auka fyllinguna með því að mauka 1 soðna kalda kartöflu eða 1 brauðsneið án skorpu saman við.

Steikið sveppina í olíu ásamt hvítlauk, rauðlauk og steinselju. Kryddið að vild. Skerið ostinn í bita. Setjið allt í matvinnsluvél og maukið saman í örstutta stund.

Tortilla-kökurnar eru penslaðar vel með pískuðu eggi á þær hliðar sem leggjast saman. Fyllingin sett á aðra kökuna og hin leggst ofan á. Sett á heitt mínútugrill í nokkrar mínútur eða þar til kökurnar hafa fengið fallegar bökunarrendur. Þessar kökur má líka baka í ofni, grilli eða á pönnu en þá þarf að snúa þeim við. Borðað heitt eða kalt við öll möguleg tækifæri.

 

Bakaðir sveppahattar

8 ferskir sveppahattar, meðalstórir

50 g smjör

2 hvítlauksrif, smátt söxuð

fersk steinselja

salt og pipar

ostur, t.d. gráðostur, dalayrja eða camembert

Skerið stafina frá, saxið smátt og steikið í smjöri ásamt hvítlauk og steinselju. Penslið hattana með bræddu smjöri bæði að utan og innan. Setjið þá í eldfast fat með kúptu hliðina niður og fyllinguna í þá. 

Skerið ostinn í hæfilega stóra bita og setjið ofan á fyllinguna. Bakið í 200°C hita í 5 til 6 mínútur eða þar til sveppirnir eru meyrir og osturinn bráðinn.

 

Greinin birtist fyrst í Fréttablaðinu 3. september 2016.