Karl Th. hundskammar félaga sína í ritstjórafélaginu

Karl Th. Birgisson, ritstjóri veftímaritsins Herðubreiðar, hellir sér yfir þá Gunnar Smára Egilsson ritstjóra, Eirík Jónsson ritstjóra og Illuga Jökulsson fyrrverandi ritstjóra í pistli sem hann birti á Herðubreið nú síðdegis. Innihald pistilsins rís undir fyrirsögn hans: „Skammist ykkar“.

Karl segir þá gefa sér, og þannig dylgja um, að eiginkona Sturlu Pálssonar framkvæmdastjóra í Seðlabankanum, Helga Jónsdóttir, hafi gert Engeyingum viðvart að bankarnir, allir nema Kaupþing, myndu falla. Um er að ræða ákaflega mikilvægar innherjaupplýsingar, þær verða vart mikilvægari þó ýmsir hafi eflaust talið sig sjá í hvað stefndi. Fram hefur komið að Sturla braut trúnað og sagði konu sinni Helgu í hvað stefndi. Helga er náfrænka Bjarna Benediktssonar fjármálaráðherra og af hinni umsvifamiklu Engeyjarætt.

Fantasíður blaðamannanna

„Að lágmarki þrír fjölmiðlamenn birtu í gærkvöldi dylgjur um það, hvernig Bjarni Benediktsson tengdist leka á upplýsingum úr Seðlabankanum haustið 2008.

Þær voru samstofna og eiga það sameiginlegt, að þær eru fantasíur blaðamannanna,“ skrifar Karl.

Hann finnur þó Eiríki það til afsökunar að í frétt sem hann birti á vef sínum hafi verið sleginn fyrirvari. Því var ekki að heilsa í tilfellum hinna tveggja sem slógu því á fast á Facebook-síðum sínum að Helga hafi gert frændum sínum viðvart.

Karl vandar um við Illuga, Eirík og Smára með tilþrifum í pistli sínum: „Ætli finnist aðrir tveir fjölmiðlamenn sem hneykslast jafnmikið á því daglangt hversu óvönduð íslensk umræða er, rangt farið með staðreyndir, dylgjað, bullað og snúið út úr, og hversu slæm áhrif slík hegðun hefur á samfélagið og lýðræðið?“

Ættu að biðjast afsökunar

Karl spyr hvað hafi komið þeim til þess arna og birta sem staðreyndir hugdettur um einstakling af því að hann heitir Bjarni Benediktsson? – spyr Karl og endar pistil sinn með kröfu um afsökunarbeiðni:

„Hver sem skýringin er, þá er framkoman óboðleg ef við eigum einhvern tímann að komast upp úr sóða- og slóðahugsun.

Og þeir ættu að biðjast afsökunar sirka núna.“

Fyrir áhugamenn um fjölmiðla eru þessar umvandanir Karls sérlega athyglisverðar en allir eru þeir fjórir af sama skólanum í blaðamennsku, sem Matthías Johannessen hefur kallað heiðgula í endurminningarbók sinni, og hafa þeir starfað með einum hætti eða öðrum á fjölmiðlum svo sem Pressunni, DV og Fréttablaðinu. Allir hafa þeir svo starfað sem ritstjórar og eru þar með félagar í ritstjórafélaginu, ef taka má svo óformlega til orða.

Uppfært 17:42

Er Kalli orðin einhver Facebooklögga?

Svo virðist sem umvandanir Karls falli í grýttan jarðveg meðal þeirra sem fyrir þeim urðu. Karl deildi pistli sínum í Facebookhóp sem heitir Fjölmiðlanördar og Gunnar Smári hefur þegar svarað fyrir sitt leyti, á þeim vettvangi:

„Bíddu, ert þú einhver Facebook-lögga Kalli? Eða ert þú orðinn stóri bróðir okkar Illuga og Eiríks? Ekki vantar mig fleiri slíka. Ég ætti ekki annað eftir en að biðja þig um leyfi til að fá að rekja ættir á Facebook eða hýja á Engeyinga,“ skrifar Gunnar Smári og hann er á því að sókn sé besta vörnin og segir að Karl megi skammast sín fyrir að taka ljósmynd af sér af vefnum ... „þjófurinn þinn.“