Ólafía Þórunn tapaði þremur höggum á fyrri níu holunum

Ólafía Þórunn Kristinsdóttir er búin að missa frá sér toppsætið á Fatima Bint Mubarak mótinu á LET Evrópumótaröðinni í Abú Dabí. Forystan GR-ingsins var farin eftir aðeins nokkrar holur.

Ólafía Þórunn spilaði stórkostlega fyrstu tvo dagana og var hún með þriggja högga forskot fyrir daginn í dag. Slæm byrjun þýddi að forystan var fljót að fara hjá okkar konu.

Ólafía tapaði þremur höggum á fyrstu níu holunum dagsins eftir að hafa fengið skolla á fyrstu tveimur holunum og svo einn til viðbótar á holu sex. Ólafía rétt missti púttið fyrir parinu á sjöttu holunni.

Ólafía Þórunn er nú samanlagt tíu höggum undir pari sem skilar henni fjórða sætinu á mótinu eins og er. Ólafía er í fjórða sætinu með þremur öðrum kylfingum.

Ólafía Þórunn spilaði fyrri níu holurnar á fjórum höggum undir pari fyrsta daginn og þremur höggum undir pari í gær. Hún fékk fugl á bæði holum eitt og tvö í gær en aftur á móti skolla á þessum sömu holum í dag.  

Eftir skolla á fyrstu tveimur holunum þá náði Ólafía samt að para sex af næstu sjö holum. Hún fékk nokkur fuglafæri en nýtti þau ekki. Það er mikill munur á spilamennsku hennar í dag miðað við í gær og í fyrradag.

Átta fuglar á holunum eitt til níu á fyrstu tveimur hringunum en nú enginn fugl og þrír skollar. Þetta er mikil sveifla hjá Ólafíu en það var ljóst að það myndi aldrei allt ganga upp hjá henni.

Nú reynir á Ólafíu að halda haus og halda sér inni í toppbaráttunni á mótinu.

Sarah Kemp frá Ástralíu og Melissa Reid frá Englandi eru báðar komnar fjórtán högg undir parið og þar með fjórum höggum á undan Ólafíu. Kemp og Reid hafa báðar spilað fyrstu tíu holur dagsins á fimm höggum undir pari.

Það er hægt að fylgjast með Ólafíu Þórunni í beinni útsendingu inn á Vísi.