Lögregla vanvirti sextán ára stúlku á Akranesi með því að láta hana afklæðast

Íslenska ríkinu var í Héraðsdómi Reykjavíkur í gær gert að greiða unglingsstúlku 800 þúsund krónur í miskabætur vegna líkamsleitar sem lögreglan á Akranesi framkvæmdi á henni í ágúst í fyrra, þegar hún var sextán ára. Stúlkan var látin afklæðast vegna gruns lögreglu um að hún væri með fíkniefni á sér.

Stúlkan var farþegi í bíl á leið frá Ólafsvík til Reykjavíkur ásamt öðrum ungmennum þegar lögregla stöðvaði bílinn, eftir að hafa fengið tilkynningu frá ónafngreindum aðila um að ungmennin væru undir áhrifum

Ungmennin voru öll flutt á lögreglustöðina á Akranesi þar sem líkamsleit var gerð á stúlkunni. Í dómnum segir að leitin hafi farið þannig fram að stúlkan hafi verið látin afklæðast í fangaklefa og að lögreglukona hafi því næst skipað henni að beygja sig fram til að skoða inn í kynfæri og rass.

Stúlkan gaf leyfi fyrir skoðuninni, en dómurinn taldi það engu breyta, enda var hún barn að aldri, í haldi lögreglu og grunuð um refsiverða háttsemi. Aðspurð um hvort hún hefði veitt leyfi fyrir leitinni kvaðst hún „ekkert hafa vitað hvað hún ætti að gera eða hvað hún mætti gera“ og því bara sagt „allt í lagi“. Hún naut engrar aðstoðar utanaðkomandi við aðgerðir lögreglu og þá var móðir hennar ekki látin vita fyrr en leit var yfirstaðin.

Þá segir í niðurstöðu dómsins að framkvæmd líkamsleitarinnar hafi verið óþarflega særandi gagnvart barni auk þess að vera í engu samræmi við tilefnið. Stúlkan hafi sætt vanvirðandi meðferð sem brjóti gegn samningi Sameinuðu þjóðanna um réttindi barna.

„Þessi aðgerð var augljóslega til þess fallin að valda 16 ára gömlum unglingi töluverðum miska, en í skýrslu stefnanda og móður hennar fyrir dómi kom fram að atvikið hefði valdið henni kvíða og vanlíðan,“ segir í dómnum.

Ekkert ólöglegt fannst á ungmennunum, né í bifreiðinni.